Қазақстан әлеуметтік бағыттағы жобаларды қаржыландыру арқылы қаржылық тұрақтылықты нығайтып келеді. Бұл туралы Үкімет отырысында Қаржы министрі Мәди Такиев мәлімдеді, деп хабарлайды Social Media.
Министрдің айтуынша, шетелден қайтарылған заңсыз активтер есебінен Арнайы қорға 434 миллиард теңге түскен. Бұл қаражаттың бір бөлігіне 406 әлеуметтік жоба жүзеге асырылуда. Олардың ішінде су жүйелері, ауруханалар, мектептер мен спорт нысандары бар.
Сонымен қатар мемлекет жаңа салық жүйесін енгізіп жатыр. Оның нәтижесінде бюджетке қосымша 3-5 триллион теңге көлемінде кіріс түседі деп күтілуде. Бұл қаржы инфрақұрылымды жаңғырту мен халықты қолдауға бағытталады.
Бұрын жоспарланған тарифтік өсім де қайта қаралды. Орташа өсім 14 пайызды құрағанымен, халыққа түсетін салмақты азайту үшін кейбір тарифтер төмендетілді. Тұрғын үй-коммуналдық шаруашылық саласына 150 миллиард теңгеден астам инвестиция құйылды, жыл соңына дейін бұл сома 1 триллион теңгеден асады.
Мемлекеттің қаржылық саясаты бүгінде әділ бөлініс пен халықтың әл-ауқатын арттыруға бағытталып отыр.
