Ядролық инжиниринг саласындағы жетекші әлемдік тәуелсіз компаниялардың бірі — Assystem Қазақстан Республикасының атом-энергетикалық бағдарламасын іске асыруда қолдау көрсету мақсатында «Қазақстандық атом электр станциялары» ЖШС (ҚАЭС) техникалық кеңесшісі ретінде бекітілді, деп хабарлайды Social Media.
Assystem ҚАЭС-ке АЭС жобасын іске асыру барысында инжиниринг, жобаны басқару және құрылыс жұмыстарын кешенді түрде ұсынып, олардың орындалуына техникалық бақылау жүргізетін болады. Компания Біріккен Араб Әмірліктері, Сауд Арабиясы және Түркия сияқты атом энергетикасын енді дамыта бастаған көптеген елдермен жұмыс істеп келеді. Бұл бағытта Assystem-нің халықаралық ядролық энергетика саласындағы бірегей тәжірибесі бар. Сондай-ақ компания Франция мен Ұлыбританияның ұлттық атом бағдарламаларына белсенді қатысып, жетекші орын алады.
Қазақстанда атом энергетикасын дамыту «Қазақстан-2050» стратегиясының бір бөлігі болып табылады. Оның мақсаты — қазіргі таңда электр энергиясының шамамен 70%-ын құрайтын көмір мен мұнайға тәуелділікті азайтып, баламалы энергия көздерінің үлесін 50%-ға дейін арттыру. 2025 жылдың басынан бастап Assystem озық халықаралық тәжірибе негізінде ҚАЭС әдіснамасын жетілдіруге атсалысып, технологияларды іріктеу кезінде Атом энергетикасы жөніндегі халықаралық агенттіктің (АЭХА) ұсынымдарына (NP-T-1.10) сай келуін қамтамасыз етуге көмектесуде.
Assystem Group бас директорының орынбасары Стефан Обарбье өз пікірінде былай деді:
«Қазақстанмен оның жаңа атом энергетикалық бағдарламасы аясында ынтымақтастық орнатқанымызға қуаныштымыз. Assystem командасы осындай маңызды бағдарламаға қатысуға дайын және оның АЭХА мен ҚАЭС талаптарына толық сай келетін қауіпсіз әрі тиімді іске асырылуына баса назар аударады».
Assystem — ядролық энергетика саласындағы әлемдегі жетекші тәуелсіз инжинирингтік компаниялардың бірі. Компания тұрақты энергетикаға көшу үдерісін жеделдетуге ұмтылады. Қауіпсіздік пен қорғанысқа қойылатын қатаң талаптары бар жоғары реттелетін салаларда 55 жылдан астам жұмыс тәжірибесі бар Assystem тобы инфрақұрылым объектілерін бүкіл өмірлік циклі бойы тиімді пайдалану үшін инжиниринг, жобаларды басқару және цифрлық шешімдер ұсынады.
Assystem-нің 12 елде орналасқан 8 000-ға жуық сарапшысы энергетикалық ауысымды жүзеге асыруға өз үлесін қосуда. Қолжетімді әрі төмен көміртекті энергиямен қамтамасыз ету мақсатында компания төмен көміртекті генерацияны (соның ішінде атомдық және жаңартылатын энергетика мен электр желілері) және таза сутекті дамыту бағыттарын белсенді түрде ілгерілетуде.
Сондай-ақ, топ төмен көміртекті электр энергиясын көлік және өнеркәсіп сияқты салаларда қолдануды кеңейтуге ықпал етуде. Қазіргі таңда Assystem ядролық энергетика саласындағы әлемдегі үш ірі инжинирингтік компанияның қатарына кіреді.
