Петропавлдағы көпсалалы облыстық аурухана базасында ми қан тамырлары ауруларын заманауи емдеу әдістеріне арналған тәжірибелік мастер-класс өтті, деп хабарлайды Social Media.
Іс-шараға Астанадағы Ұлттық нейрохирургия орталығының тамырлы және функционалдық нейрохирургия бөлімшесінің дәрігері Бауржан Құнақбаев қатысты. Оның сапары өңірдің медицина қауымдастығы үшін маңызды оқиға болды, өйткені облыс мамандары астаналық әріптесінің тәжірибесін меңгеріп қана қоймай, онымен бірге бірқатар күрделі операцияларды да жасады.
Солтүстік Қазақстан облысының дәрігерлерімен бірге астаналық маман өмірге қауіпті патологияларды жоюға бағытталған оталар жүргізді. Олардың ішінде – артериовенозды мальформация мен ми аневризмасын эмболизациялау бар. Бұл дерттер қан тамырларының құрылымының бұзылуымен және қан құйылу қаупінің жоғарылығымен байланысты болғандықтан, науқастың өмірі мен денсаулығына тікелей қауіп төндіреді.
Артериовенозды мальформацияны эмболизациялау аз инвазивті әдістерге жатады. Ота барысында дәрігерлер мидағы қан айналымын бұзатын артериялар мен веналардың патологиялық байланысын жояды. Мұндай тәсіл ашық операциядан бас тартуға, асқыну қаупін азайтуға және науқастың сауығу үдерісін едәуір жылдамдатуға мүмкіндік береді.
Мастер-класс аясында СҚО-ның 1954, 1976 және 1982 жылы туған үш тұрғынына операция жасалды. Барлық науқас отаны сәтті өткеріп, оң динамикамен ауруханадан шығарылды. Өңір тұрғындары үшін мұндай ем-шаралар өзге қалаларға бармай-ақ, өз жерінде жоғары білікті көмек алу мүмкіндігін берді.
Ерекше атап өтерлігі, емдеу толық көлемде міндетті әлеуметтік медициналық сақтандыру жүйесі есебінен жүргізілді. МӘМС арқасында пациенттер қосымша қаржылық шығынсыз жоғары технологиялық медициналық көмекке қол жеткізді.
Мастер-класс өткізілуі Солтүстік Қазақстан облысында қазіргі заманғы нейрохирургия әдістерін енгізуге барлық жағдай бар екенін көрсетті. Мұндай іс-шаралар өңір дәрігерлерінің кәсіби дамуына, медициналық көмектің сапасын арттыруға және елдің жетекші орталықтарының мамандарымен ынтымақтастықты нығайтуға ықпал етеді.
