Солтүстік Қазақстан облысында инженерлік инфрақұрылымды жаңарту және су мен кәріз желілеріндегі апаттылықты төмендетуге бағытталған «Қызылжар Су» ЖШС-нің ауқымды инвестициялық бағдарламасы жүзеге асырылып жатыр, деп хабарлайды Social Media.
Бағдарлама аясында кәсіпорын 34 проблемалық нысанда күрделі жөндеу жұмыстарын жүргізуді жоспарлаған. Оның бір бөлігі биыл аяқталады, ал қалғандары келесі жылға ауыстырылады.
Табиғи монополияларды реттеу комитетінің департамент мамандары кәсіпорын нысандарының жағдайына мониторинг жүргізді. Нәтижесінде бағдарламаның жоспарланған мерзімге сәйкес орындалып жатқанын көрсетті. 2025 жылы инвестицияның жалпы көлемі 365 миллион теңгені құрады, оның 260 миллион теңгеден астамы кәсіпорынның меншікті қаражаты есебінен бөлінді. Бұл қаржыға үш шақырымнан астам инженерлік желілерге күрделі жөндеу жасау көзделген.
«Қызылжар Су» ЖШС бас инженері Андрей Фомиченконың айтуынша, күздің ортасына қарай жоспарланған жұмыстардың шамамен жартысы орындалған. Қызметкерлер 2,4 шақырым су құбыры мен 1,6 шақырым кәріз желісін төсеп үлгерді. Жыл соңына дейін тағы 6,4 шақырым су құбыры мен 2,5 шақырым кәріз желісін салу жоспарланып отыр. Барлық тендерлер алдын ала өткізілген, мердігерлер анықталған, сондықтан компания бағдарламаны белгіленген мерзімде толық аяқтайтынына сенімді.
Жаңа учаскелерді төсеумен қатар, жыл басынан бері мамандар сүзгі станциясындағы технологиялық құбырлар мен бекітпе арматурасына тексеру және жөндеу жұмыстарын жүргізді. Су және кәріз желілерінде құдықтарды, өрт гидранттарын және су тарту колонкаларын жөндеу, сондай-ақ кәріз жүйелерін шаю жұмыстары атқарылды. Кәсіпорын бригадалары қыс мезгіліндегі апаттарды жою кезінде зақымданған жолдар мен тротуарларды қалпына келтіріп, екі мың шаршы метрге жуық асфальт төседі.
Бағдарламаны дамытуға биыл енгізілген дифференциалды тариф те өз үлесін қосты. Одан түскен қосымша табыс 71 миллион теңгені құрап, бұл қаражат апатты су және кәріз желілерінің учаскелерін ауыстыруға бағытталды. Андрей Фомиченконың айтуынша, жыл сайын нақты жоспар жасалып, жобалау-сметалық құжаттамалар әзірленеді, содан кейін жаңғырту бағдарламасы іске қосылады. Инвестжоба аясында барлығы 24 жобалық-сметалық құжат (ЖСҚ) әзірленген, оның төртеуі биыл жүзеге асырылуы тиіс. Су құбыры мен су бұру жүйелері бойынша жобалық жұмыстар аяқталу сатысында – олар сараптамаға жіберілді.
Инвестициялық бағдарламаның жүзеге асырылуы инженерлік коммуникациялардың тозуын біртіндеп азайтып, су жоғалту көлемін қысқартып, қала мен облыстың сумен жабдықтау жүйесінің сенімділігін арттыруға мүмкіндік береді. Кәсіпорын басшылығы инфрақұрылымды жаңарту бойынша жүйелі жұмыс жыл сайын жалғасып келе жатқанын және дәл осындай тәсіл өңірдің коммуналдық шаруашылығының тұрақты дамуын қамтамасыз ететінін атап өтті.
