Солтүстік Қазақстан облысында ұлттық спорт түрлері бойынша өткен «Qyzyljar–2025» өңірлік спартакиадасы өз мәресіне жетті. Командалық есеп қорытындысы бойынша Аққайың ауданы үздік деп танылды. Бұл туралы СҚО дене шынықтыру және спорт басқармасы хабарлады, деп жазады Social Media.
Спартакиада Аққайың ауданының Смирново ауылында өткен халықтық спорт ойындарының XXIX облыстық спартакиадасы аясында ұйымдастырылды. Ұлттық спорт түрлерінен — көкпар, қазақ күресі, тоғызқұмалақ, асық ату және басқа да жарыстарда 13 ауданнан келген 650-ден астам спортшы бақ сынасты.
«Командалық есеп нәтижесі бойынша бірінші орынды 264 ұпай жинаған Аққайың ауданы иеленді. Екінші орын 205 ұпаймен Шал ақын ауданына бұйырды. Ал үшінші орынды 187,5 ұпаймен Ақжар ауданы жеңіп алды. Ұлттық спортты дамытуға үлес қосқан барлық қатысушыларға, жаттықтырушыларға және жанкүйерлерге алғыс айтамыз», – деп атап өтті салалық басқарма өкілдері.
Жарыс жеңімпаздары мен жүлдегерлері салтанатты түрде дипломдармен және бағалы сыйлықтармен марапатталды. Көрермендер жарыстан жарқын әсер алып, жағымды эмоцияға бөленді. Алдағы уақытта келесі ауқымды фестиваль Есіл ауданында өтетіні белгілі болды.
