Петропавл қаласы мен Солтүстік Қазақстан облысының аудандарында «AMANAT» партиясының азаматтардың өмірі мен денсаулығына қауіп төндіруі мүмкін нысандар мен орындардың жай-күйін тексеруге бағытталған акциясы өтті, деп хабарлайды Social Media.
Рейд барысында партия мүшелері ерекше назарды ашық қалдырылған құдықтар мен люктердің, электр қалқандарының жағдайына, сондай-ақ білім беру және әлеуметтік мекемелердегі балалар қауіпсіздігіне аударды.
Партия өкілдері ашық люктер мәселесі абаттандыру саласындағы ең өзекті әрі көп жағдайда бағаланбай отырған проблемалардың бірі екенін атап өтті. Коммуналдық қызметтердің жұмысына қарамастан, люк қақпақтарының ұрлану жағдайлары, әсіресе қаланың шет аймақтарында және ауылдық жерлерде, әлі де орын алуда. Бұл ретте жарақат алу қаупі айтарлықтай жоғары болып қала береді.
Акция қатысушылары Петропавлдың шет аймақтарындағы құдықтар мен люктерді аралап көрді. Айтарлықтай заңбұзушылықтар анықталған жоқ. Дегенмен, партия мүшелері бір ғана оқиғаның қайғылы жағдайға айналуы мүмкін екенін айтып, қауіптің алдын алу шараларының маңыздылығын атап өтті.
«Біз қайғылы оқиға болғанын күтіп отыра алмаймыз. Рейдтердің басты мақсаты — кінәлілерді іздеу емес, қауіпті дер кезінде жою. Әр азамат түсінуі керек: егер ашық немесе дұрыс жабылмаған люк көрсе, бұл туралы тиісті қызметтерге дереу хабарлау қажет», — деді қалалық мәслихат депутаты Тимур Жұманов.
Акция аясында тұрғын үй аулаларындағы электр қалқандары да тексерілді. Мұндай нысандардың дұрыс күтім көрмеуі көбіне тұрмыстық өрттердің себебіне айналады.
Сонымен қатар, акция қатысушылары балалар қауіпсіздігі мәселелеріне ерекше назар аударды. Өкінішке қарай, елімізде, соның ішінде Солтүстік Қазақстан облысында да, балалардың терезеден құлап кетуіне байланысты қайғылы жағдайлар әлі де тіркелуде. Осыған байланысты «Бақытты отбасы» партиялық жобасы аясында белсенділер білім беру және әлеуметтік мекемелерде терезелерге орнатылған құлыптар мен бекіткіштердің бар-жоғын тексерді.
«Біз әрбір пәтерге кіре алмаймыз, бірақ балалар болатын қоғамдық орындардан бастауға болады. Ең бастысы – ата-аналарға қарапайым терезенің өзі қауіп көзі болуы мүмкін екенін еске салу. Терезе құлыптарын орнатып, балаларды қараусыз қалдырмау маңызды», – деді «AMANAT» партиясының өкілдері.
Партия алдағы уақытта да қала мен аудан деңгейінде мониторинг жүргізуді, анықталған заңбұзушылықтар туралы ақпаратты тиісті органдарға беруді жалғастырмақ. Қоғам белсенділерінің айтуынша, рейдтердің мақсаты тек проблеманы көрсету емес, сонымен қатар азаматтардың өздерін қоғамдық қауіпсіздікті қамтамасыз ету процесіне тарту болып табылады.
