Петропавл тұрғыны Владимир Царик жиырма жылдан астам уақыт бойы өз мамандығына да, туған кәсіпорнына да адал болып келеді, деп хабарлайды Social Media.
Ол «Основание» ЖШС-де 21 жыл еңбек етіп, өзін сенімді әрі жауапты маман ретінде көрсетті. Бүгінде ер адам экскаватор қондырғысының операторы болып жұмыс істейді. Демек, құрылыс алаңдарын дайындау ісінде оның тәжірибесі мен шеберлігі шешуші рөл атқарады. Іргетас үшін топырақ қазу, инженерлік желілерді тарту, су құбырлары мен коммуникацияларды жүргізу – компанияның бірде-бір ірі нысаны оның қатысуынсыз өтпейді.
Владимир еңбек ететін бригада «Жас Өркен» шағынауданындағы жаңа балабақшаның құрылысына атсалысты. 280 орынға есептелген нысан дайын, және бұл құрылысшылар үшін жай ғана жоба емес, қаланың болашағына қосқан үлес. Экскаваторшы жұмысына барынша жауапкершілікпен қарайтынын айтады, өйткені оның еңбегінің сапасына бүкіл ғимараттың беріктігі байланысты.
Құрылысшы мамандығы оның отбасылық дәстүріне айналған. Ағасы Виктор да «Основание» компаниясында жұмыс істейді, бірақ басқа нысанда. Былтыр бауырлар еңбектегі адалдығы және саланың дамуына қосқан үлесі үшін «Еңбек даңқы» орденімен марапатталды. Әсіресе өткен жылғы су тасқыны кезінде олар әріптестерімен бірге төтенше жағдайда дамбалар тұрғызып, бекітіп, суды ұстап қалуға және қиратулардың алдын алуға белсене қатысты.
Владимирдің өзі мұндай іссапарларға үйреніп кеткенін айтады: жұмыс оны облыстың түрлі нысандарына апарады. Жақында ол бригадасымен бірге Бескөлде болды, онда елді мекендерді су тасқынынан қорғау үшін топырақ нығайту, жер үйінділерін тұрғызу және су ағызу арналарының құрылысы жүргізілді.
Бүгінде Владимир Царик серіктестіктегі жалғыз экскаваторшы болып отыр. Кәсіпорын басшысы Сергей Тимофеевтің айтуынша, механизаторлардың жетіспеушілігі айқын сезіледі. Оның сөзінше, егер бір кірпіш қалаушы жұмысқа шықпай қалса, құрылыс қарқыны қатты тежелмейді. Бірақ техника істен шықса немесе экскаваторшы, краншы не бульдозерші жұмысқа келмесе – бүкіл жұмыс тоқтап қалады. Сондықтан кәсіпорын жас мамандарды қабылдауға, оларды оқытуға және тіпті мамандығын ауыстырғысы келгендерді қайта даярлауға дайын.
Владимир мен оның отбасының тарихы – бір ғана мысал. Адалдық пен тәжірибе бүкіл құрылыс компаниясының тірегіне айналып отыр. «Основание» ЖШС құрылғанына 30 жыл ішінде талай буын еңбеккерлерін тәрбиеледі. Бүгінде ұйым дамуын жалғастырып, оқу орындарымен әріптестік орнатып, студенттерді тәжірибеге шақырады, кейін оларды жұмысқа орналастырады. Мұның бәрі кәсібилік дәстүрін сақтап, оны көбейтуге мүмкіндік береді. Ал бұл дәстүрлердің іргетасы Владимир Царик пен оның әріптестері сияқты адамдардың еңбегіне сүйенеді.
