Сенбі күні таңертең Абу Досмухамбетұлы атындағы дарынды балаларға арналған мамандандырылған гимназия-интернаты әдеттегіден ерте жанданды. Сағат тоғызға жетпей жатып-ақ, дәліздер күлкіге, әңгімеге, шағын қарбалас пен толқуға толды. Мұнда Солтүстік Қазақстан облысының 9–11 сынып оқушылары республикалық «JasREPUBLIC CUP» дебат турнирінің облыстық кезеңінде ой жарыстыру үшін жиналды, деп хабарлайды Social Media.
Таңсәріден оқушылар гимназия залына ағылды. Бірі қолына аргументтері жазылған парақтарын ұстап шықса, енді бірі соңғы жаңалықтарды қызу талқылап, ал үшіншілері алда күтіп тұрған маңызды күнге іштей дайындалып отырды. Сағат 09:00-де қысқаша брифинг өтіп, ұйымдастырушылар WSDF форматы мен ережелерін еске салды. Ал 10:00-де бәрі басталды: алғашқы раунд, алғашқы эмоциялар, алғашқы пікірталас.
Турнирге барлығы 22 команда қатысты: қазақ лигасында – 10, орыс лигасында – 12 команда. Жалпы саны – 63 оқушы. Әрқайсысы тек жеңіс үшін емес, тәжірибе жинап, өзін сынау үшін келді. Залда ерекше атмосфера орнады: толқу мен қызығушылық астасып, нағыз бәсекелестік рухы сезілді.
«Бұл турнир оқушылардың көшбасшылық қасиеттерін ашып, сыни ойлауды, өз пікірін қорғауды және өзгелердің көзқарасын құрметтеуді үйрететінін тағы бір дәлелдеді. Біз командаларымызбен мақтанамыз және республикалық деңгейде де облысымызды лайықты танытады деп сенеміз», – деді СҚО дебат қозғалысының үйлестірушісі, КМҚК «Әдістемелік орталық» әдіскері Сабина Нұрпиисова.
Турнирдің басты сәні – әрине, оқушылардың өздері. 11-сынып оқушысы Мадина Тасбулатова дебаттағы жолын қуаныш пен аздап толқу аралас сезіммен былай сипаттады:
«Мен бірнеше жылдан бері дебат үйірмесіне қатысып келемін. Ол маған көптеген жаңа мүмкіндіктер берді. Соңғы екі жылда облыстық та, республикалық та турнирлерге қатыстым. Мысалы, жақында біз Семей қаласында өткен республикалық дебатқа барып, жақсы нәтиже көрсетіп, мол тәжірибе жинап қайттық. Мен осы турнирде де жеңіске жетеміз деп қатты үміттенемін».
Мадинаның сөзі шынайы әрі ересекше естіледі. Мұндай оқушылар үшін дебат – жай ғана ойын немесе жарыс емес, өмір мектебі. Мұнда олар қарсыласын тыңдауды, ойын жүйелі жеткізуді, дәлел келтіруді және әділ әрі сыйластықпен пікірталасуды үйренеді.
Бес раунд көзді ашып-жұмғанша өтті. Қазылар алқасы әрбір сөзді мұқият тыңдап, әділ бағалады. Бірі қуанып, бірі уайымдады, бірақ бейжай қалған ешкім болмады. Финалда жеңімпаздар анықталды: қазақ лигасында – «Фемида» командасы, орыс лигасында – «Абсолют» командасы. Дәл осы екі команда 19–20 қазанда Астанада өтетін республикалық финалда Солтүстік Қазақстан облысының намысын қорғайтын болады.
Қатысушылар үшін бұл күн нағыз сынаққа айналды, ал біреулер үшін – жаңа бастаманың алғашқы қадамы болды. Мүмкін, бірнеше жылдан кейін біз бұл оқушылардың есімдерін саясаттан, бизнестен немесе қоғамдық өмірден еститін боламыз. Бәлкім, турнирдің басты жеңісі – кубоктар мен грамоталар емес, керісінше, болашақтың дәл осындай пікірталастардан, сөзден және бір-бірін тыңдау қабілетінен басталатынына сенім шығар.
