Петропавл қалалық мәслихатының кезектен тыс 28-сессиясында негізгі мәселелердің бірі 2025–2027 жылдарға арналған үш жылдық кезеңнің бюджеті талқыланып, бекітілуі болды. Сонымен қатар ағымдағы жылдың бюджетіне түзету енгізу мәселесі де қаралды, деп хабарлайды Social Media.
Қалалық әкімдіктің экономика және қаржы бөлімінің басшысы Марат Ерханов бюджет шығындарын бір жарым миллиард теңгеден астам сомаға ұлғайту қажеттігін атап өтті. Бұл қаражаттың негізгі бөлігі тұрғын үй-коммуналдық шаруашылығына бағытталады – шамамен 800 миллион теңге. Оның ішінде 275 миллион теңге – жолаушылар тасымалын субсидиялауға, 200 миллион теңге – коммуналдық қызметтер ақысын төлеуге, сондай-ақ 85 миллион теңге – бұрын бекітілген шығындар шеңберінде қалалық бюджеттен бөлінбек.
Баяндамасында Ерханов ботаникалық бақ аумағындағы жекеменшік ғимаратты сатып алу үшін 170 миллион теңге бөлу туралы да ұсыныс айтты. Бұл нысан жеке меншікте болғанымен, қала әкімінің орынбасары Калия Туренованың айтуынша, ол мекеменің толыққанды жұмыс істеуі үшін маңызды. Қазір ботаникалық бақтың екі ғимараты бюджет есебінен қаржыландырылады, ал оларды байланыстырып тұрған құрылыс жеке меншік иесіне тиесілі. Осы себепті әкімдік ғимаратты сатып алып, оны коммуналдық меншікке өткізу ұсынысын енгізді.
Алайда депутаттар бұл бастамаға күмәнмен қарады. Олар мәміленің дайын екенін растайтын нақты құжаттардың болмауына және ғимараттың соңғы бағалау құны ұсынылмағанына назар аударды. Депутат Павел Афанасьев 170 миллион теңге тек бастапқы шығын болуы мүмкін екенін және сатып алу рәсімінің нақтылығы әзірге түсініксіз екенін айтты.
Талқылау қорытындысы бойынша депутаттар бұл тармақты бюджетке енгізу әзірге ерте деп шешті. Дауыс беру нәтижесінде ұсыныс қабылданбай, босап қалған қаржы қаланың өзекті қажеттіліктеріне бағытталатын болды.
Осылайша, Петропавл қаласының ағымдағы жылға арналған бюджетіне түзету енгізу бекітілді, алайда ботаникалық баққа қатысты бірқатар бастамалар кейінге қалдырылды. Мәслихат шешімі бюджет қаражатын барынша тиімді пайдалану және бірінші кезектегі мәселелерге назар аударуға бағытталғанын көрсетті.
