Александр Кобзев – Солтүстік Қазақстан облысының Айыртау ауданына қарасты Саумалкөл ауылында тұратын 45 жастағы азамат. Көп жылдан бері ол бастың созылмалы, кейде тіпті төзгісіз ауруынан зардап шегіп келді. Бұл жағдай оның күнделікті өмір сүру сапасын айтарлықтай төмендетіп, жұмысқа деген қабілетіне де әсер етті. Уайым мен белгісіздік жағдайында ол түрлі медициналық мекемелерге, соның ішінде мемлекеттік және жекеменшік клиникаларға жүгінген. Алайда, нақты диагноз қойылмады, деп хабарлайды Social Media.
Александрдың басты мәселелерінің бірі – оның салмағы болды. 145 келі салмақпен ол МРТ аппаратына түсе алмады, себебі көп жағдайда бұл құрылғылар 120 келіден аспайтын науқастарға ғана арналған. Заманауи диагностиканың мүмкіндігін пайдалана алмағандықтан, оның жағдайы уақыт өте келе ушыға берді.
Соңғы айда Александрдың жағдайы күрт нашарлады: бас ауруы жиілеп, есінен тану, амнезия белгілері пайда болды. Тіпті, оның денесінің сол жағы жансызданып, қозғалысы шектелді. Көру қабілеті де әлсірей бастаған. Бұл ауыр жағдайды көрген анасы дереу ұлын облыстық көпсалалы ауруханаға жеткізді.
Ауруханаға түскен кезде дәрігерлер шұғыл түрде тексеріс жұмыстарын бастап кетті. Ауырсыну салдарынан Александрдың тәбеті төмендеп, ол 25 келі салмақ тастады. Нәтижесінде оның салмағы 120 келіге дейін төмендеп, бұл МРТ-дан өтуге мүмкіндік берді. Үш күн бойы қажетті анализдер мен зерттеулер жүргізілгеннен кейін, миында үлкен ісік бары анықталды.
Кейін белгілі болғандай, миындағы ісіктің көлемі 6,5 см x 6 см x 6 см болған. Дәрігерлер дереу ота жасау туралы шешім қабылдап, бес сағатқа созылған күрделі нейрохирургиялық операция жасады. Ота сәтті өтіп, ісік толық алынды.
Қазіргі таңда Александрдың жағдайы біршама жақсарды. Жүйке жүйесінің жұмысы тұрақталып, есі мен қозғалысы қалпына келіп келеді. Ота жасаған нейрохирург Балхар Шатуевтың айтуынша, алынған ісік гистологиялық сараптамаға жіберілді.
«Ісіктің сипаты анықталғаннан кейін, қажетті ем-дом түрі белгіленеді. Егер қатерлі ісік болып шықса, онда химиотерапия тағайындалады. Бейсенбі күні пациентті үйіне шығаруды жоспарлап отырмыз», – дейді Балхар Шатуев.
Бұл оқиға тек жеке адамның тағдыры ғана емес, сонымен қатар уақытылы медициналық көмек пен мемлекеттің қолдау жүйелерінің маңыздылығын көрсетеді. Александрдың өмірін сақтап қалуға мүмкіндік берген ОСМС жүйесінің рөлі айтарлықтай зор.
