СҚО әкімі Ғауез Нұрмұхамбетовтың төрағалығымен өткен жұмыс кеңесінде су тасқыны кезеңіне дайындық мәселелері талқыланды. ТЖД, Қазгидромет басшыларының және аудан әкімдерінің селекторлық байланыс бойынша баяндамалары тыңдалды, деп хабарлайды Social Media.
“Су тасқыны мәселесі өңір үшін өте маңызды. Қатты су тасқыны елеулі зардаптарға әкеп соққан өткен жылғы сценарийдің қайталануына жол бермеу маңызды. Дайындық үздіксіз жүргізілуде: жөндеу және инженерлік жұмыстар бір күнге де тоқтамады, тіпті қыста да жалғасуда”, – деді облыс әкімі.
109 іс-шараны қамтитын инженерлік жұмыстар жоспары аясында түрлі жұмыстар жүргізілді.
Олардың ішінде 8 қорғаныш бөгетін нығайту, облыс бойынша 80 км бөгеттер мен үйінділерді салу және күшейту, автожолдарда 108 су өткізу құбырлары мен тюбингтер орнату, 10 км су бұру арықтары мен арналарын тереңдету, шағын өзендердің 4 км арналарын тазарту, 214 км нөсер кәрізін тазарту және жөндеу, сондай-ақ сорғы станциясын қайта жаңартуды аяқтау.
Өткен жылғы су тасқынының ерекшеліктерін ескере отырып, қосымша шаралар іске асырылуда. Есіл өзенінде су тіреуінің пайда болуын болдырмау үшін Петропавл су торабының жанында айналма канал құрылысы басталды. Бұл алдын ала тасқын суларды ағызуға және облыс орталығының шағын аудандарын су басудың алдын алуға мүмкіндік береді.
Соколовка және Большая Малышка ауылдарының маңында жағалауларды тазарту және өзен арнасында канал орнату жұмыстары жүргізілуде.
Петропавлдағы Есіл өзені мен шағын өзендердің 49 учаскесінде және 8 ауданда мұз кептелісін болдырмау және еріген судың кедергісіз өтуін қамтамасыз ету үшін алдын алу жарылыс жұмыстары жүргізілетін болады.
“Қазір облыс үшін жауапты кезең. Мемлекеттік органдар күшейтілген жұмыс режиміне көшірілді. Дайындық жұмыстарын, әсіресе инертті материалдарды, қаптарды және техниканы дайындау бойынша мұқият жүргізу қажет. Сондай-ақ, жергілікті тұрғындардың пікірлері мен ұсыныстарын ескеру маңызды”, – деп атап өтті өңір басшысы.
Жақын арада аудандарда кездесулер өтеді, онда міндеттер мен басым жұмыстар нақтыланады.
