Петропавлда түркі әлемінің ақыны, философы және ағартушысы Мағжан Жұмабаевқа арналған Қазақстандағы алғашқы ғылыми–мәдени хаб ашылды, деп хабарлайды Social Media.
«Мағжан орталығы» деп аталған жаңа орталық – тек атақты жерлесіміздің өмірі мен шығармашылығы туралы материалдар жинақталған орын ғана емес, сонымен қатар ғылыми, мәдени және білім беру бастамаларын біріктіруге арналған кеңістік болып табылады.
Салтанатты рәсімге билік, мәдениет, ғылым өкілдері және ақынның туыстары қатысты. Солтүстікқазақстандықтарға арнап сөз сөйлеген ҚР Премьер-Министрінің орынбасары Ермек Кошербаев әдебиет, өнер мен мәдениет мемлекеттің рухани кодын қалыптастыратынын атап өтті.
Ол соңғы жылдары ел ғылым, білім және өнерді дамытуға ерекше мән беріп отырғанын, ал жаңа орталық сияқты жобалар мәдени және рухани жаңғыру жолындағы маңызды қадамдар екенін айтты.
Солтүстік Қазақстан облысының әкімі Гауез Нұрмұхамбетов Мағжан Жұмабаев өңір үшін тек ұлттық мұра ғана емес, мәдени сәйкестіліктің символы екенін еске салды. Ақынның таланты солтүстік далаларда бой көтеріп, мінезі мен дүниетанымы туған жердің ықпалымен қалыптасқан. Аймақ басшысының айтуынша, ақынның есімі Қазақстаннан тыс, әсіресе Түркия, Әзербайжан, Өзбекстан және Қырғызстан сияқты түркі елдерінде кең танымал және құрметке ие.
Орталықтың ерекше мәні – оның XIX ғасырдағы сәулет ескерткіші «Қалыңдық үйінде» орналасқандығында. Ішкі интерьер ақынның өмір сүрген және шығармашылықпен айналысқан ортасына барынша жақындатылған. Жақын жерде ақын балалық шағында әкесімен бірге баратын мешіт бар, бұл орынға тарихи мән береді.
Орталық экспозициясында ерекше архивтік материалдар, ақынның отбасының тұрмыстық заттары, сирек құжаттар мен басылымдар жинақталған. Солардың ішінде – Мағжан Жұмабаев төрағалық еткен ғылыми комиссия дайындаған Абай Құнанбаевтың өлең жинағы және 1920-жылдары Мәскеуде шыққан оқу құралы бар. Солтүстік Қазақстан мемлекеттік архивінің директоры Сауле Мәлікова бұл экспонаттар алғаш рет жаңа орталық аясында көпшілік назарына ұсынылғанын атап өтті.
«Мағжан орталығының» жетекшісі Жарасбай Сүлейменов орталықтың миссиясы – ақынның мұрасын сақтау ғана емес, оның құндылықтарын жас ұрпаққа жеткізу екенін айтты. Мұнда дәрістер, жазушылар мен зерттеушілер кездесулері, сондай-ақ Жұмабаев шығармашылығын насихаттау мен әдебиетке қызығушылықты дамытуға арналған білім беру бағдарламалары жүргізілетін болады.
Ақынның ұрпағы Марат Муслимов хаб жастардың бет бұрар орны болатынына үміт білдірді. Ол Мағжанның «Мен жастарға сенемін» деген сөзін еске салып, технология тез дамып жатқан дәуірде де тарихқа және ата-бабаларға құрмет сақтау маңызды екенін атап өтті.
Жаңа орталық конференц-залдар, кітапхана және архивпен жұмыс жасау кабинетімен жабдықталған. Оның қабырғасында ғылыми зерттеулер, мәдени жобалар және халықаралық кездесулер өткізілетін болады. «Мағжан орталығының» ашылуы Солтүстік Қазақстан облысы үшін ғана емес, бүкіл ел үшін маңызды оқиға болып, мәдени мұраны сақтау мен оны келешек ұрпаққа жеткізу символына айналды.
