Петропавлда электр энергиясы мен жылу тарифтерінің ұзақ мерзімді мәселелері бойынша жария тыңдаулар өтті, деп хабарлайды Social Media.
2026–2030 жылдарға арналған «Солтүстік Қазақстан аймақтық электр желілік компаниясы» АҚ-ның шекті тариф деңгейі мен тарифтік сметасының жобасы қаралды. Бүгінде кәсіпорын Петропавл қаласы мен облыстың сегіз ауданын электр энергиясымен қамтамасыз етіп, 165 мыңнан астам тұтынушыға қызмет көрсетеді.
«СК РЭК» АҚ бас директоры Александр Чекулаевтың айтуынша, компания 13 мың километрден астам электр желілерін және кернеуі 0,4-тен 220 киловольтқа дейінгі екі мыңнан астам қосалқы станцияны пайдаланады. Кәсіпорынның қызмет көрсету аумағы шамамен 44 мың шаршы шақырымды құрайды. Қазіргі уақытта электр энергиясын жеткізу тарифі 1 киловатт-сағат үшін 9,09 теңге деңгейінде бекітілген, алайда оның қолданылу мерзімі 2025 жылдың соңында аяқталады. Осыған байланысты 2026 жылдан бастап күшіне енетін жаңа тарифті бекіту үшін уәкілетті органға өтінім берілді.
Компания шығындарының ең үлкен бөлігі қызметкерлердің еңбекақысын төлеуге, жабдықты жөндеуге, электр энергиясы шығындарын өтеуге және инвестициялық бағдарламаны жүзеге асыруға кетеді. Басшылықтың мәліметінше, негізгі құралдардың тозу деңгейі 84%-дан асып кеткен, бұл электрмен жабдықтаудың сенімділігіне тікелей әсер етеді және инфрақұрылымды жаңартуға айтарлықтай қаражатты қажет етеді.
Жаңа тарифті 1 киловатт-сағат үшін 15,34 теңге деңгейінде белгілеу ұсынылды. Бұл қолданыстағы тарифтен шамамен 69% жоғары. Алайда, Александр Чекулаев атап өткендей, есептеулер табиғи монополиялар туралы заңнамаға, сондай-ақ салық және бухгалтерлік есеп талаптарына толық сәйкес жүргізілген.
Тарифтің өсуі компанияға желілер мен қосалқы станцияларды жаңғыртуға, моральдық тұрғыдан ескірген жабдықты ауыстыруға, заманауи ажыратқыштар мен трансформаторларды орнатуға қосымша қаражат бөлуге мүмкіндік береді. Сонымен қатар, электр беру желілеріне күрделі жөндеу жүргізу, арнайы техника сатып алу және жаңа нысандар салу жоспарланған. Мұның бәрі көрсетілетін қызметтердің сапасын арттыруға және өңір тұтынушыларын үздіксіз энергиямен қамтамасыз етуге бағытталмақ.
