Петропавлда Қазақстан мен Ресей жастары мен ересектерін бір мәдени кеңістікте тоғыстырған «Абайды оқып, таңдан!» атты халықаралық телебайланыс өтті, деп хабарлайды Social Media.
Шара 6 тамыз күні Ғабит Мүсірепов атындағы облыстық балалар мен жасөспірімдер кітапханасында өтіп, Омбы облыстық балалар мен жасөспірімдер кітапханасымен және Нефтеюганск қалалық орталық кітапханасымен көпжылдық ынтымақтастықтың жалғасы болды.
Телебайланыстың мақсаты – ұлы қазақ ойшылы, ақыны Абай Құнанбайұлының «Қара сөздерін» оқу ғана емес, оның философиялық және адамгершілік идеяларын терең түсіну еді. Қазіргі заманда бір-бірімізді естіп, түсіну маңызды болып тұрған шақта мұндай іс-шаралар гуманитарлық байланыстарды нығайтып, мәдениеттер арасындағы қарым-қатынасты кеңейтеді.
«Бұл шараға дайындықты біз сәуір айынан бастадық, – дейді облыстық балалар мен жасөспірімдер кітапханасының әдіскері Баян Мұқажанова. – Абай Құнанбайұлының 180 жылдығы қарсаңында біз «Абайды оқып, таңдан!» атауымен Абай оқуларын өткізуді жөн көрдік. Бұл сөздерді бекер таңдаған жоқпыз – олар әлі де өзекті. Бүгін қатысушылар тек «Қара сөздерді» оқып қана қоймай, олардың мазмұнын талқылайды, неге дәл осы сөзді таңдағанын, оның мәні мен өзектілігін сұрайды».
Қазақстан тарапынан 9–10 сынып оқушылары мен студенттер – барлығы бес адам қатысты. Ресейлік әріптестері – Омбы мен Нефтеюганскіден үш қатысушыдан. Дегенмен мәтіндермен жұмысқа жастардың көбі атсалысқан. Әр қатысушы алдын ала іріктеуден өтіп, таңдаған сөзін мұғалімдерімен және құрдастарымен талқылаған.
Бағдарламаның ерекше сәті – Оқпан Серы атындағы облыстық филармония солисі Ғалымжан Нұрпейісов орындаған Абай әні болды. Бұл телебайланысқа ерекше эмоция беріп, бірлік атмосферасын қалыптастырды.
«Біз Абайдың тек бізде ғана емес, Ресейде де қалай оқылатынын көрсеткіміз келеді, – деп атап өтті Баян Мұқажанова. – Омбы мен Нефтеюганскіден келген қатысушылар тек оқулар ғана емес, поэзиялық нөмірлер де дайындады. Біз өз тарапымыздан қатысушыларға арнап алғыс хаттар әзірледік, оларды электронды түрде әріптестерімізге жібердік».
Дайындық барысында Абай шығармаларының қағаз және электронды нұсқалары пайдаланылды. Петропавл кітапханасы алдын ала Нефтеюганск пен Омбыға қазақстандық классика жинағын – оның ішінде «Қара сөздерді», Жамбыл шығармаларын және қазақ ертегілерін жолдады. Бұл кітап алмасу сәуір айында өткен халықаралық кітап сыйлау мерекесінің бір бөлігі болды.
Қазақстандық қатысушы Ангелина Улузанова әсерімен бөлісті: «Мен үшін бұл Абайға арналған алғашқы шара емес. Бес жыл бұрын мен ақынның 175 жылдығына арналған сурет байқауына қатыстым. Ол кезде балалардың суреттерінен үлкен портрет құрастырылды, мен соны пазлдардан жинау мүмкіндігіне ие болдым. Биыл мен жиырмасыншы «қара сөзді» таңдадым. Ол менің жүрегіме ерекше жақын. Біз оны бүкіл отбасымызбен талқыладық. Мысалы, тоқмейілсу туралы сөз бізде қызу пікірталас тудырды: анам Абайдың ойымен келісті, ал мен – жоқ. Дәл осындай пікір алмасулар бұл сөздерді тірі етеді. Мұнда бір ғана дұрыс жауап жоқ – бұл олардың ерекшелігі».
Кітапханашылардың айтуынша, телебайланыс тек әдеби шара ғана емес, елдер арасындағы достық көпіріне айналды. Қатысушылар тек мәтіндерді оқып қана қоймай, пікір алмасты, өзара құрмет білдірді, тіпті бір-бірін қазақ тілінде сәлемдесті.
«Ресейлік әріптестеріміздің «сәлеметсіз бе», «сау болыңыз» деп айтуы біз үшін өте қымбат. Бұл – олардың бізді түсінуге, мәдениетімізді сезінуге ұмтылып жатқанын білдіреді. Біз мұны бағалаймыз», – деді Баян Мұқажанова.
Іс-шара соңында мұндай форматтағы – телебайланыс, конференция, оқулар – жұмыстың жалғасатыны айтылды. Биылдың өзінде бірнеше осындай кездесу өтті, соның ішінде Отан қорғаушылар күніне арналған «Батырлар мен баһадүрлер» әдеби ойыны да бар.
Халықаралық телебайланыс аясындағы Абай оқулары жай ғана мәдени іс-шара емес, интеллектуалды диалог пен рухани бірліктің символына айналды. Абай Құнанбайұлының мұрасы ғасыр бұрынғыдай бүгін де өзекті, ал жастардың шынайы қызығушылығына қарағанда, әлі талай жылдар бойы жаңғыра беретіні анық.
