Петропавл қаласында Байкен Ашимов атындағы машина жасау және көлік колледжінде республикалық «Таза Қазақстан» экологиялық бағдарламасы аясында «Эко IQ» зияткерлік ойыны өтті. Оған студенттер қатысып, өз білімдерін көрсетіп қана қоймай, қоршаған орта алдындағы жеке жауапкершілік туралы да ойланды. Танымдық шараны Қоғамдық даму және ақпарат орталығының жастар бастамалары бөлімі ұйымдастырды, деп хабарлайды Social Media.
Қатысушылар үш командаға бөлініп, ойын барысын жанкүйерлер мен қазылар алқасы бақылады. Ойын екі кезеңнен тұрды, олардың әрқайсысы студенттердің эрудициясын, логикалық ойлауын және экологиялық сауаттылығын тексерді.
Бірінші кезеңде экология тақырыбында базалық және күрделірек сұрақтар қойылды. Мысалы: полиэтилен пакеті қанша жылдан кейін ыдырай бастайды? немесе парниктік әсердің негізгі себебі болып табылатын газ қайсы? Екінші кезеңде студенттер логикалық ойлау мен топтық жұмысқа бағытталған тапсырмаларды орындады — оларға тақырыптық сөйлемдердің логикалық тізбегін қалпына келтіру ұсынылды.
Ойынға қатысушылардың бірі — екінші курс студенті Евгения Губская. Ол тұрақты түрде сенбіліктер мен экологиялық бастамаларға қатысып, табиғатты қорғауға өз үлесін қосып келеді.
«Менің ойымша, мұндай іс-шаралар жастар үшін өте маңызды. Олар бізге экологиялық жағдайды жақсырақ түсінуге және әрқайсымыздың табиғатты қорғауға қаншалықты үлес қоса алатынымызды сезінуге көмектеседі. Мен үнемі сенбіліктерге қатысып, тазалық пен тәртіпті сақтауға тырысамын. Жастар табиғатқа жауапкершілікпен қарауы керек деп ойлаймын», – дейді студент.
Ұйымдастырушылардың айтуынша, зияткерлік ойын форматы жастардың экологиялық мәселелерге қызығушылығын арттырып қана қоймай, сыни ойлау мен экологиялық мәдениетті қалыптастыруға ықпал етеді.
«Біздің мақсатымыз – қатысушыларды табиғатты қорғау тақырыбын тереңірек зерттеуге шабыттандыру. Ойын тапсырмалары арқылы жастар түрлі жағдайларды талдап, нақты әрі тиімді шешімдер табуға үйренеді. Бұл – еліміздің алдында тұрған маңызды экологиялық міндеттермен жақынырақ танысуға тамаша мүмкіндік», – деді Қоғамдық даму және ақпарат орталығының жастар бастамалары бөлімінің маманы Алмагүл Ғаббас.
Іс-шара соңында командалар I, II және III орындар үшін дипломдармен және тәтті сыйлықтармен марапатталды. Қатысушылар табиғатты сақтау, экологиялық әдеттер мен қоршаған ортаға ұқыпты қарау жөнінде көптеген жаңа білім алғандарын атап өтті.
