Петропавлдағы «Масло-Дел Петропавловск» ЖШС-нің май экстракциялау зауыты – майлы дақылдарды өңдеумен айналысатын заманауи әрі жас кәсіпорын. Жобаны іске асыруға 34 миллиард теңге жұмсалған. Бүгінде зауыт күнбағыс және зығыр майын, сондай-ақ жмых пен шрот өндіреді. Алдағы жоспар – лецитин өндіру үшін өсімдік майын терең өңдеу цехын іске қосу, деп хабарлайды Social Media.
Зауыт тәулігіне 1 500 тоннаға дейін майлы дақылдарды өңдей алады, бұл жылына шамамен 370 мың тоннаны құрайды. Кәсіпорында 140 жұмыс орны ашылған, қызметкерлердің орташа жалақысы 300 мың теңгеге жетеді.
«2024 жылы 3 452 тонна тазартылмаған күнбағыс майы мен 3 415 тонна жмых өндірілді, 9 100 тоннадан астам тұқым өңделді. 2025 жылдың қаңтар–қазан айларында шамамен 40 мың тонна күнбағыс майы және 52 300 тонна жмых өндірілді. Шығарылған өнім Алматы қаласындағы «Масло-Дел» ЖШС-нің май-тоңмай комбинатына жөнелтіледі», – деп хабарлады СҚО Ауыл шаруашылығы және жер қатынастары басқармасының баспасөз қызметі.
Шикізат жергілікті ауыл шаруашылығы тауарын өндірушілерінен сатып алынады. Бұл өңір шаруашылықтарын қолдауға және тұрақты жеткізуді қамтамасыз етуге мүмкіндік береді. Қазіргі уақытта кәсіпорында 2 мың тонна күнбағыс тұқымы, 800 тонна рапс жмыхы және 50 тонна күнбағыс жмыхы бар. Зауытта Германия, Бельгия және Түркияда шығарылған заманауи жабдықтар қолданылып, өнім сапасын және өндіріс тиімділігін арттырады.
«Өндірісте ыстық сығу технологиясы пайдаланылады. Зауыттың жұмысы толықтай автоматтандырылған және қалдықсыз, алынған қауыз қазандықта жағылады. Қазандықтың қуаты – сағатына 24 тонна бу. Қазіргі таңда зауыт қуатының 50%-ымен жұмыс істеп тұр, экстракция және гидратация желілерін іске қосу арқылы 100% өнімділікке жету жоспарланып отыр», – деді ведомство өкілдері.
Сондай-ақ бұл зауытта өсімдік майын терең өңдеу арқылы лецитин өндіретін цех іске қосу жоспарланған. Ол үшін қуаттылығы жылына 2 мың тонна болатын, Бельгияда жасалған заманауи еуропалық желі сатып алынған. Өндіріс ай сайын емес, нақты — тазартылмаған күнбағыс майынан механикалық әдіспен жүргізіледі. Бір тонна майдан 0,5–1,2% көлемінде лецитин алынады. Жобаның жалпы инвестициясы – 1,1 миллиард теңге. Цехты іске қосу 2025 жылдың соңына жоспарланған.
