Петропавлда полиция қызметкерлерінің жедел әрі батыл әрекеттерінің арқасында мүмкін болатын қайғылы жағдайдың алдын алынды. Құқық қорғаушылар өртеніп жатқан үйден ер адамды шығарып, газ баллонын алып шықты. Бұл туралы Солтүстік Қазақстан облысы Полиция департаменті хабарлады, деп жазады Social Media.
Төтенше жағдай 16 қыркүйекке қараған түні Петропавлдың Рабочий кентінде болған. Көпқабатты үйлердің бірінің тұрғыны қарсы беттегі жеке үйдің өртеніп жатқанын байқап, бірден полицияға хабарласқан. Өрт туралы қоңырау кезекші бөлімге 01:42-де түсті.
Оқиға орнына ең жақын жерде учаскелік инспектор Жалғас Масанов пен патрульдік полиция батальонының қызметкері Жақсылық Көжелдәков болған. Олар сол сәтте учаскелік пунктте басқа шақыру бойынша материалдарды рәсімдеп жатқан. Өрт туралы хабарды алған соң, полицейлер уақыт жоғалтпай, үйге жаяу жүгіріп жеткен.
Олар келген кезде үйдің бір бұрышы толықтай жанып, от тез тарала бастаған. Есіктің іші құлыптаулы болған. Оянған көршінің көмегімен полицейлер ішке кіреді. Үйдің іші түтінге тола бастаған.
Іште 35 жастағы ер адам болған. Полицейлер оны оятып, қажетті заттарын жинауға көмектесіп, сыртқа алып шыққан. Сондай-ақ, олар үйден газ баллонын тауып, оны да сыртқа шығарған. Бұл ықтимал жарылыстың алдын алды.
«Мен не болып жатқанын түсінбей де қалдым. Кейін ғана ойландым – егер полицейлер болмағанда, мен тұншығып немесе жанып кетуім мүмкін еді. Олар – менің періштелерім, енді менің екі туған күнім бар», – деді құтқарылған ер адам.
Оқиға орнына өрт сөндірушілер келіп, өртті тез арада ауыздықтап, толық сөндірді. Полиция қызметкерлерінің кәсібилігі мен жедел әрекетінің арқасында адам өмірі ғана емес, үлкен апаттың да алдын алынды. Осыдан кейін тәртіп сақшылары қызметін жалғастырды.
