Биылғы жылдың басынан бері Петропавлда полицейлер абаттандыру ережелерін бұзудың бес мыңға жуық жағдайын анықтады. Әсіресе ірі көлемдегі қоқыс пен құрылыс қалдықтарын дұрыс шығармау мәселесі жиі кездеседі, деп хабарлайды Social Media.
Қаланың түрлі аудандарындағы қоқыс алаңдары жиі ескі жиһаздар мен тұрмыстық заттарға толып, рұқсатсыз қоқыс үйінділерінің пайда болуына әкелуде.
Тұрғындардың айтуынша, бір адам үйінің қасында қажетсіз заттарды қалдырса, көп ұзамай ол жерге өзгелер де қоқыс тасыдыра бастайды. Мұндай жағдай, мысалы, Қарым Сүтішев көшесінде болды: бір тұрғын құрылыс қалдықтарын шығарғаны үшін әкімшілік жауапкершілікке тартылды. Алайда, ПИК төрағасы Виталий Волковтың айтуынша, тек айыппұл мәселені түбегейлі шешпейді. Оның сөзіне қарағанда, тұрғындар түсінуі керек: ауланы абаттандыруға немесе жөндеуге жұмсалуы тиіс қаражат өзгенің қоқысын шығаруға кетеді. Бұл шығынды ережені адал сақтайтындар да көтеруге мәжбүр.
Жергілікті полиция қызметі бөлімінің бастығы, подполковник Айдын Ақмағамбетов атап өткендей, ауладағы тазалықты сақтау – тек коммуналдық қызметтердің немесе учаскелік инспекторлардың міндеті емес, әрбір тұрғынның жауапкершілігі. Ол ірі көлемдегі қоқыс, жиһаз немесе құрылыс қалдықтарын азаматтар өздері шығару керектігін, ал оларды қоқыс алаңына тастау – абаттандыру ережесін бұзу болып саналатынын еске салды.
Қалалық полиция басқармасының мәліметінше, биыл тоғыз айдың ішінде 4800-ден астам әкімшілік хаттама толтырылған. Ведомство қаладағы тәртіп әр тұрғынның қоршаған ортаға құрметпен қарауынан және қарапайым ережелерді сақтаудан басталатынын ескертеді. Солтүстік Қазақстан облысында «Заң және тәртіп» қағидаты құқық қорғау органдары тарапынан бақылауды ғана емес, азаматтардың саналы қатысуын да көздейді.
