Петропавлда қала тұрғынының қырағылығы қоғамдық қауіпсіздікке төнуі мүмкін қатердің алдын алуға көмектесті, деп хабарлайды Social Media.
35 жастағы ер адам Рабочий кентінің маңындағы айналма жолмен велосипедпен келе жатып, жол жиегінен күдікті затты байқап қалған. Қауіп төнуі мүмкін екенін түсінген ол бейжай қалмай, Қазақстан Конституциясы көшесіне шыққан кезде жолыққан полиция жасағына дереу өзінің тапқан заты жайлы хабарлаған.
Жедел қызметтер дер кезінде әрекет етіп, оқиға орнына жедел-тергеу тобын шақырды. Мамандар келіп, табылған затты тәркілеп, криминалистикалық сараптамаға жіберді. Зерттеу нәтижесі оның «Оса» маркалы травматикалық тапанша екенін, сериялық нөмірлері өшірілгенін анықтады. Қару техникалық тұрғыда жарамды және атуға қабілетті болып шықты. Барлық қажетті рәсімдер аяқталған соң тапанша белгіленген тәртіппен жойылады.
Құқық қорғау органдары қала тұрғынының жауапкершілік танытқанын және мұндай жағдайда дұрыс әрекет еткенін атап өтті. Қару-жарақ, оқ-дәрі немесе оларға ұқсас зат табылған жағдайда полицияға дереу хабарлау маңызды. Оларды өз бетінше сақтау немесе тасымалдау – ауыр құқықтық салдарға әкелуі мүмкін.
Қолданыстағы заңнамаға сәйкес, қаруды заңсыз сақтау немесе иемдену – әкімшілік немесе қылмыстық жауапкершілікке тартылады. Биыл Солтүстік Қазақстан облысында заңсыз айналымнан 109 бірлік тіркелмеген қару тәркіленді. Заңды бұзғандардың барлығы тиісті жазасын алды.
Сонымен қатар, тәртіп сақшылары қаруды ерікті түрде тапсыру – жауапкершіліктен босататынын еске салады. Жыл басынан бері облыстың 22 тұрғыны осы мүмкіндікті пайдаланып, жазадан құтылып қана қоймай, қоғамдық қауіпсіздікті нығайтуға үлес қосты. Мұндай азаматтық бастама құқықтық мәдениетті қалыптастыруға және өңірде «Заң мен Тәртіп» идеологиясын қолдауға ықпал етеді.
Петропавл тағы да дәлелдеді: қауіпсіздік – бейжай қарамаудан басталады. Қауіп төндіруі мүмкін зат туралы дер кезінде хабарлау – профилактиканың маңызды бөлігі, ал азаматтардың саналы әрекеті қоғамдағы тәртіпті қамтамасыз етуде басты рөл атқарады.
