Петропавлда Республика күніне орай ерекше көрме ашылды. Бұл жолы «Ботай» өнер галереясында бостандықтан айырылған адамдардың қолынан шыққан суреттер көпшілік назарына ұсынылды, деп хабарлайды Social Media.
Экспозицияға 16 жұмыс қойылған. Авторлар өз туындылары арқылы жүрек түкпіріндегі сезімдерін, естеліктері мен үміттерін жеткізуге тырысқан. Суреттерде туған үйдің бейнесі, өткен өмір жайлы ой-толғаныс, жақындарына деген сүйіспеншілік пен Отанмен байланысты сақтап қалуға деген ұмтылыс айқын сезіледі.
Бұл сотталғандар үшін жай ғана шығармашылық жаттығу емес – әрбір жұмыс олардың айта алмаған жан сырын бейнелейді. Мәселен, 54 жастағы Оксананың суретінде оның жеке өмірлік күйзелістері көрініс тапқан. №66 тергеу изоляторының психологы Ильина Попованың айтуынша, шығармашылық процесі ішкі кедергілерді жойып, адамдарға ашылуға мүмкіндік берген. Ол әсіресе «туған үй» тақырыбына жүгінудің маңызы зор екенін атап өтті, себебі ол адамның ішкі жан дүниесін, тұлғалық болмысын және дүниетанымын қалыптастырады.
Өнер түзеу мекемелерінде тәрбиелік қана емес, емдік рөл де атқарады. Ол сотталғандарға оқшау өмірдің психологиялық қысымын еңсеруге, ішкі ширығуды төмендетуге және эмоцияларын шығаруға көмектеседі. Мұндай бастамалар олардың қоғамға қайта оралуына, өз ойын еркін жеткізуге және жаңа жағдайға бейімделуге ықпал етеді.
Солтүстік Қазақстан облысы прокуратурасы басқармасының прокуроры Самат Төлюгеновтің сөзінше, мұндай жобалар сотталғандардың қайта әлеуметтенуіне, патриоттық сезімін тәрбиелеуге және қылмыстық-атқару заңнамасының міндеттеріне сай жұмыс істеуге мүмкіндік береді. Қала тұрғындары уақытша қойылған суреттерді тамашалап, заң бұзған адамдардың да көзге көрінбейтін ішкі жан дүниесін таныды. Жұмыстары қазылар алқасы тарапынан жоғары бағаланған қатысушылар үшін ынталандыру шаралары қарастырылған.
Көрме жұмыстары алдын ала сарапталды, ешбір сурет елеусіз қалмады. Ұйымдастырушылар әр туындының мәнін түсіндіріп, көрермендерге авторлардың ішкі күйін сезінуге жағдай жасады. Осылайша, көрме тек өнер оқиғасы ғана емес, сонымен қатар адамның түзелуі мен қоғамға қайта оралу мәселесіне өнер тілі арқылы үңілуге мүмкіндік берген әлеуметтік жобаға айналды.
