Петропавл тағы да шабыт пен шығармашылықтың ерекше рухына бөленді. Сәбит Мұқанов атындағы қазақ музыкалық-драма театрының XXVII театр маусымының ашылуы – тек ұжым үшін ғана емес, сонымен бірге сахнаның сиқырын сағынған көрермендер үшін де көптен күткен маңызды сәт болды. Бұл жерде әрбір сөз, әрбір қимыл мен әуен көрерменнің алдында жанды өнерге айналып, жүректерге жетеді, деп хабарлайды Social Media.
Жаңа маусым көрермендерге эмоциялар мен әсерлерге толы сәттер сыйламақ. Театр алуан түрлі және мазмұнды бағдарлама дайындады. Қыркүйек айында өңір тұрғындары он бір қойылымды тамашалап, театр әлеміне тағы бір қадам жасай алады. Барлық спектакльдер орыс тіліне ілеспе аудармамен ұсынылып, әр көрерменнің туындының тереңдігі мен сұлулығын толыққанды сезінуіне мүмкіндік береді.
«Мөлдір махаббат» спектаклінің премьерасы Сәбит Мұқановтың 125 жылдығына арналды. Қойылым жазушының шығармашылығына және оның өмірлік көзқарастарына арналған. Премьера сағат 19:00-де басталып, көрермендерге актерлердің шынайылықпен жеткізген әсерлі оқиғасын көруге мүмкіндік туады.
Маусымның ашылуы тек премьерамен шектелмеді. Өңір қонақтары мен тұрғындарына арналған мерекелік концерттік бағдарлама ұсынылды. Кеш өнердің шынайы мерекесіне айналды: сахнада ән әуендері шырқалып, ақындар жыры оқылды, ал актерлердің өнері көрермендерді шабыт пен қуанышқа бөледі. Кеш бойы толассыз қол шапалақтар мен шат күлкілер театр залының ажарын аша түсті.
Сәбит Мұқанов атындағы театр жаңа маусымды ғана емес, өзінің жаңа тарихын да бастап отыр. Бұл – ұрпақтарды жалғайтын, өнерге деген сүйіспеншілікті дәріптейтін, көрерменге қуаныш пен терең ой сыйлайтын дәстүрдің жалғасы. Мұнда әркім өзіне қажеттісін табады: біреулер үшін – демалыс пен шабыт, екіншілер үшін – жаңа білім мен әсер, үшіншілер үшін – қайталанбас тірі өнермен кездесу.
Театр тағы да есігін айқара ашып, көрермендерді сұлулық пен үйлесім әлеміне шақырады. Жаңа маусым қуанышқа, махаббатқа және өнерге деген мәңгілік ұмтылысқа толы болмақ.
