16 тамыз күні Петропавлдағы «Қарасай» стадионында жанкүйерлер тартысты кездесудің куәсі болды. «Қызылжар» мен «Женіс» 1:1 есебімен тең ойнады. Дегенмен, ойын барысы құрғақ статистикадан әлдеқайда драмалы өтті, деп хабарлайды Social Media.
Алғаш болып астаналық ұжым алға шықты. 43-минутта Аслан Әділ Сәги Совет берген пасты нәтижелі аяқтап, «Женісті» есепте алға шығарды. Қонақтар үзіліске көтеріңкі көңіл-күймен кетсе, алаң иелеріне ойынды құтқаратын жол іздеуге тура келді.
Алайда екінші тайм басталысымен «Қызылжардың» жағдайы қиындай түсті. Украиналық қорғаушы Анатолий Козленко тікелей қызыл қағаз алып, командасын 10 ойыншымен қалдырды. Турнир кестесінде жоғары тұрған қарсыласпен бір тайм бойы кем құрамда ойнау – кез келген ұжымға ауыр сынақ.
Соған қарамастан, петропавлдықтар берілмеді. Трибуналардың қолдауы мен намыс жігерге айналды. Милич Чурчич шәкірттері шабуылдарын жалғастырып, ақыры жемісін көрді. 81-минутта Қазақстан құрамасының жартылай қорғаушысы Самат Жаринбетов алға қосылып, ивуарлық шабуылшы Сенин Себаидің дәл пасын голға айналдырды. Стадион шаттыққа бөленді – «Қызылжар» есепті теңестірді.
Қалған минуттар жүйкені тоздырған нағыз сынаққа айналды. Астаналықтар жеңісті жұлып алуға тырысса, алаң иелері жігерленіп, ерекше қарқынмен ойнады. Бірақ финалдық ысқырық тең нәтижені тіркеді. Бұл есеп петропавлдықтардың табандылығы мен рухын айқын көрсетті.
21-турдан кейінгі Қазақстан Премьер-лигасының турнир кестесінде «Женіс» 28 ұпаймен сегізінші орында, ал «Қызылжар» 21 ұпаймен тоғызыншы сатыда тұр.
«Қызылжардың» бас бапкері Милич Чурчич ойыннан кейін шәкірттерін ерекше атап өтті:
«Біздің футболшылар бүгін барын салды. Өкінішке қарай, футболда бәрін шешетін – гол соғу. Бізде соққылар көп болды, сәттер жеткілікті болды, бірақ дәлдік жетіспеді. Бір тайм бойы кем құрамда ойнау – ауыр сынақ, алайда жігіттер намыспен күресті. «Женіс» те сапалы футбол көрсетті, бірақ мүмкіндіктер бізде көбірек болды деп ойлаймын. Бүгін жеңіске жете алмадық, дегенмен команда жақсы ойын көрсете алатынын дәлелдеді», – деді бапкер.
Бұл тең есеп «Қызылжар» үшін тек алынған ұпай ғана емес, ең қиын жағдайда да соңына дейін күресуге дайын екенінің дәлелі болды.
