Петропавлда балалар мен жасөспірімдердің облыстық шығармашылық орталығы ұйымдастырған жас дизайнерлер мен суретшілер арасындағы экологиялық байқау өтіп жатыр, деп хабарлайды Social Media.
Бұл шараға өңірдің түкпір-түкпірінен келген қырыққа жуық қатысушы – мектеп оқушылары, колледж студенттері және қолданбалы өнерге қызығушылық танытқан жас шеберлер жиналды.
Байқаудың басты мақсаты – жастардың шығармашылық қабілеттерін көрсету ғана емес, сонымен қатар табиғатқа деген жауапкершілік сезімін қалыптастыру. Қатысушыларға ерекше тапсырма берілді: ескі киім мен қажетсіз материалдарды пайдаланып, бірегей аксессуар жасау. Осылайша олар өз қиялын қолданып, тұрмыстағы заттарға екінші өмір сыйлаудың жолын көрсетуі тиіс.
Облыстық шығармашылық орталығының әдіскері Любовь Фомич атап өткендей, байқаудың идеясы эстетикалық талғамды, шығармашылық ойлауды және суретші мен дизайнер мамандығына қызығушылықты дамытуға бағытталған.
«Біз жастардың қарапайым заттардан сұлулықты көре білуін, ескіні жаңаша түрлендіріп, экостильде бұйымдар жасай алуын қалаймыз. Бұл тек шығармашылық процесс емес, сонымен қатар қоршаған ортаға ұқыпты қарауға тәрбиелейтін маңызды қадам», – деді ол.
Байқау бағдарламасына практикалық бөлім – апсайклинг бойынша шеберлік сабағы да енгізілген. Онда қатысушылар ескі киімді сәнді гардероб элементіне айналдыруды үйренеді. «Томирис» сән театрының жетекшісі Наталья Козловская өз идеяларымен бөлісіп, шеберліктің қыр-сырын көрсетті.
«Кәдімгі түймелерден де әдемі сәндік элементтер жасауға болады. Егер түсі ұнамаса – өзгертуге болады, ал ескі свитер немесе сөмкені кестемен не моншақпен әсемдеуге әбден болады. Ең бастысы – тәжірибеден қорықпау», – деді ол.
Байқауға қатысушылардың бірі – №23 мектептің оқушысы Дарья Островская. Ол шығармашылықпен бала кезінен айналысатынын айтады. Байқауға ол ескі джинсы, мата қиықтары мен моншақ алып келіп, жүрек пішінді брошка жасады.
«Дизайнын өзім екі күнде ойлап таптым. Өз қолыммен бір нәрсе жасаған ұнайды. Болашақта өмірімді шығармашылықпен байланыстырғым келеді», – деді Дарья.
Қазылар алқасы идеяның ерекшелігі мен жұмыс сапасын ғана емес, экологиялық тақырыпқа сәйкестігін де бағалайды. Барлық қатысушыларға дипломдар мен алғыс хаттар табысталып, жеңімпаздар «Балдаурен» балалар лагеріне жолдама алады.
Экобайқау жас солтүстікқазақстандықтар үшін өз таланттарын көрсетіп, жаңа нәрсе үйреніп, шығармашылық пен экологиялық сананы үйлестіруге мүмкіндік берген ерекше алаңға айналды.
