Солтүстік Қазақстан облысының Қызылжар ауданындағы Тепличное ауылындағы қорғаныс бөгетін қайта жаңғыртуға Үкімет резервінен шамамен 1,4 млрд теңге бөлінді, деп хабарлайды Social Media.
Тиісті қаулыға Премьер-Министр Олжас Бектенов қол қойды. Жұмыстар Президент Қасым-Жомарт Тоқаевтың су тасқынына қарсы нысандарды нығайту жөніндегі тапсырмаларын орындау аясында жүргізілуде.
Қайта жаңғыртудың мақсаты – нысанның сенімділігін арттыру және елді мекеннің толық қорғалуын қамтамасыз ету. Бөгетті толық реконструкциялау жобасы автожолдарды қалпына келтіруді, темірбетон плиталарын төсеуді, дренаж жүйесін орнатуды және абаттандыру жұмыстарын қамтиды. Барлық іс-шаралар аяқталғаннан кейін гидротехникалық нысанның жоғарғы деңгейі 2024 жылғы су тасқынының ең жоғары деңгейіне сәйкестендірілетін болады.
Жобаны іске асыру нәтижесінде шамамен мың тұрғыны бар Тепличное ауылы су тасқыны кезеңінде сенімді қорғалады.
Үкімет елді мекендерді су тасқынынан қорғау бойынша жүйелі жұмыс жүргізіп келеді. Су ресурстары және ирригация министрлігінің деректеріне сәйкес, алты өңірде – Ақмола, Ақтөбе, Батыс Қазақстан, Қостанай, Павлодар және Солтүстік Қазақстан облыстарында – гидротехникалық нысандарды қалпына келтіру және салу бойынша 57 жоба іске асырылуда, оның ішінде 13 жаңа нысанның құрылысы қарастырылған. Бүгінгі таңда 57 нысанның 40-ы аяқталды, жалпы 221 км қорғаныс бөгеттері салынды және нығайтылды, бұл жоспардың 91%-ын құрайды.
Тепличное ауылындағы қорғаныс бөгеті 1980 жылы пайдалануға берілген. Алғашқыда бөгеттің ұзындығы 380 м, орташа ені 11 м, биіктігі 4 м болған.
2024 жылғы су тасқыны кезінде Қызылжар ауданында жергілікті ауқымдағы табиғи сипаттағы төтенше жағдай жарияланды. Есіл өзенінің тасуы салдарынан Тепличное ауылындағы қорғаныс бөгеті апатты жағдайға ұшырады. 2024 жылғы су тасқынынан кейінгі қалпына келтіру жұмыстары барысында бөгеттің ұзындығы арттырылды.
