Президент Қасым-Жомарт Тоқаев халыққа Жолдауында цифрлық технологияларды жедел енгізудің маңыздылығына ерекше тоқталды, деп хабарлайды Social Media.
Оның тапсырмасы бойынша жақын арада Жасанды интеллект және цифрлық даму министрлігі құрылады. Бұл орган қоғам өмірінің барлық саласында цифрландыруды жүйелі түрде ілгерілету міндетін атқарады. Президенттің айтуынша, цифрлық трансформация мемлекеттік органдардың жұмыс тиімділігін арттыру құралы ғана емес, сондай-ақ экономиканы, білім беру, денсаулық сақтау және әлеуметтік салаларды дамытудағы қуатты тетік болуы тиіс.
Сала мамандары бұл бастамаларды оң қабылдады. IT-SKO hub аймақтық орталығының директоры Нургул Булатованың сөзінше, қазір елде Жасанды интеллекттің негізгі қағидаттары мен стандарттарын айқындайтын жаңа Цифрлық кодекс әзірленіп жатыр. Барлық бағдарламалар мен жобалар «Digital Qazaqstan» бірыңғай стратегиясына біріктірілмек. Бұл қайталануды болдырмай, енгізілетін шешімдердің тиімділігін арттыруға мүмкіндік береді. Ерекше назар өңірлік деңгейге аударылуда: әр облыстағы IT-hub-тар қосымша функцияларға ие болып, цифрлық тәжірибелерді тек қалаларда ғана емес, ауылдық жерлерде де тарататын болады.
Білім беру мәселелеріне жеке көңіл бөлінді. Президент мектеп оқушылары үшін жасанды интеллект пен цифрлық технологиялардың негіздерін ерте жастан үйрететін арнайы бағдарламаларды әзірлеуді тапсырды. Педагогтердің пікірінше, бұл ел болашағы үшін аса маңызды қадам. №17 Ұлттық жаңғыру орта мектебінің директоры Ләззат Жалмұханованың айтуынша, цифрлық трансформация процесінде білім беру басты факторға айналып отыр. Алдағы жылдары мектептерде жаңа оқу жоспарлары енгізіліп, мұғалімдерді даярлау және қайта даярлау бағдарламалары іске қосылады. Бұл «жаңа формациядағы ұстаздарды» қалыптастыруға жол ашады. Нәтижесінде балалардың цифрлық қоғамда өмір сүруге қажетті заманауи дағдыларды меңгеруіне жағдай жасалады.
Маңызды қадамдардың бірі – Qazaq Digital Mektebi жобасын әзірлеу болмақ. Бұл шағын жинақты мектеп үлгісі шалғайдағы ауыл оқушыларына да білім ресурстарына тең қолжетімділікті қамтамасыз етеді. Жасанды интеллект заманауи әдістемелер мен материалдардың қолжетімділігін арттырып қана қоймай, ауыл мектептеріндегі кадр тапшылығын жеңуге көмектеседі.
Осылайша, Президент тапсырмалары Қазақстандағы цифрландыру дамуының жаңа бетін ашып отыр. Жүргізілетін кешенді шаралар IT саласын ғана емес, сондай-ақ білім беру, медицина, агробизнес және тұрғын үй-коммуналдық шаруашылық сияқты маңызды бағыттарды қамтиды. Алдағы жылдары цифрландыру күнделікті өмірдің ажырамас бөлігіне айналып, жасанды интеллект елдің болашағын айқындайтын негізгі құралдардың бірі болмақ.
