Солтүстік Қазақстан облысының әкімі Ғауез Нұрмұхамбетов Аққайың ауданына жұмыс сапары барысында Дайындық ауылында жаңа әлеуметтік нысандардың ашылуына қатысты, деп хабарлайды Social Media.
Соңғы жылдары айтарлықтай өзгерістерге ұшыраған Дайындық бүгінде өңірдің алдыңғы қатарлы елді мекендерінің бірі саналады.
Осыдан отыз жыл бұрын ауыл тозған күйде болып, көптеген үйлер қаңырап бос тұрған еді, инфрақұрылым да ескірген болатын. Қазір Дайындық ауылында нағыз өрлеу кезеңі басталды: жаңа ғимараттар салынып, көшелер абаттандырылып, ауылішілік жолдар асфальтталып, тұрғындардың жайлы өмір сүруіне барлық жағдай жасалуда.
Бұл өзгерістерге «Дайындық-Агро» ЖШС мен оның жетекшісі Біржан Шаймерденов үлкен үлес қосты. Оның бастамасы мен жеке қаржысының арқасында соңғы жылдары ауылда фельдшерлік-акушерлік пункт, кең ассортименті мен қолжетімді бағалары бар супермаркет және басқа да әлеуметтік нысандар бой көтерді.
Өңір басшысы атап өткендей, ауылдың дамуы – билік пен бизнестің бірлесе атқарған еңбегінің нәтижесі.
«Туған жерінің болашағына шын жанашырлық танытып жүрген жерлесіміз Біржан Шаймерденовке ерекше алғысымды білдіремін. Тек осы жылдың өзінде ғана ол өз қаражаты есебінен балабақша, 300 орындық Мәдениет үйі, спорт кешенін салып, мәдени-сауықтыру орталығына күрделі жөндеу жүргізіп, ауыл тұрғындарына арналған 15 тұрғын үй тұрғызды. Бұл – бизнестің қоғам дамуына қосқан үлесінің айқын көрінісі. Кәсіпкерлердің әлеуметтік жауапкершілігі – өңірдің өркендеуінің маңызды факторы», – деді облыс әкімі Ғауез Нұрмұхамбетов.
Бүгінде Дайындық ауылы ауылдық аумақтардың қайта жаңғыруының үлгісіне айналды. Егер бірнеше жыл бұрын мұнда бар болғаны 28 үй болса, қазір олардың саны 90-ға жуықтады. Ауылға жаңа отбасылар көшіп келіп, бала саны артып, жұмыспен қамту деңгейі өсіп келеді. Құрылған инфрақұрылым тұрғындардың өмірін жайлы әрі тартымды етіп, жергілікті еңбекқор жандардың үлгісі облыстың басқа ауылдарына да серпін беруде.
