Солтүстік Қазақстан облысының әкімі Ғаузез Нұрмұхамбетовтің Есіл ауданына жасаған жұмыс сапары мазмұнды әрі көпқырлы болды, деп хабарлайды Social Media.
Сапар барысында әлеуметтік инфрақұрылымды дамыту, көлік қатынасының қолжетімділігі мен цифрлық технологияларды жетілдіру мәселелеріне ерекше көңіл бөлінді. Бұл бағыттар ауыл тұрғындарының өмір сапасына тікелей әсер етеді.
Сапар аясындағы негізгі нысандардың бірі – Мальцево ауылы маңындағы көпір құрылысы болды. Нысан «Покровка – Ильинка – Мектеп» автожолының күрделі жөндеу жұмыстары шеңберінде салынуда. Ескі көпір апатты жағдайда болғандықтан, көлік қозғалысына айтарлықтай қиындық туғызған. Жаңа көпірдің құрылысы екі жылға есептелген, қазіргі таңда екі миллиард теңгеден астам қаржы игерілді. Жоспар бойынша, қараша айының ортасында жеңіл көліктер үшін қозғалыс ашылып, желтоқсанның ортасына қарай жүк көліктері де өте бастайды. Құрылыс жұмыстары қарқынды жүргізілуде: алаңда үш зауыттың мамандары еңбек етіп, көпір арқалықтарын жеткізумен айналысуда.
Мальцево ауылындағы тағы бір маңызды жаңалық – байланыс сапасын арттыру мақсатында антенна-мачталық құрылғының орнатылуы болды. Бұл нысан жергілікті ауыл шаруашылығы тауар өндірушісінің қаражаты есебінен тұрғызылып, шаруашылық аумағында орналасқан. Ауыл тұрғындары үшін бұл – өмір сапасын жақсартуға жасалған нақты қадам. Себебі, мобильді интернет пен тұрақты байланыс бүгінде жұмыс, оқу және әлеуметтік қызметтер үшін аса қажет. Өңірде «Қолжетімді интернет» ұлттық жобасы белсенді жүзеге асырылуда. Жоба аясында келер жылдың соңына дейін жүздеген ауылды интернетке қосу жоспарланып отыр.
Сапар барысында облыс әкімі білім беру саласына да айрықша назар аударды. Еңбек ауылында 50 оқушыға арналған жаңа бастауыш мектептің ашылу салтанаты өтті. Бұл шағын ауыл үшін айтулы оқиға – соңғы он жыл бойы балалар көрші елді мекендерге қатынап оқуға мәжбүр болған еді. Енді олардың өз ауылында сапалы білім алуына мүмкіндік туды.
Мектеп «Бай Еңбек» ЖШС қаражаты есебінен салынды. Жобаның жалпы құны – 350 миллион теңге. Идея авторы әрі бастамашысы – осы ауылдың тумасы, серіктестік басшысы Қайырбек Қожасов. Ол мектеп құрылысы өз туған жерінің дамуына қосқан жеке үлесі және өскелең ұрпақ үшін жасалған игі іс екенін атап өтті. Мектеп ғимараты заманауи оқу кабинеттерімен жабдықталған және барлық талаптарға сай келеді. Қазір мұнда 15 оқушы білім алып, 6 мұғалім сабақ береді. Ашылу күні мектепке интерактивті панель сыйға тартылды, ол оқыту процесін тиімді етуге көмектеседі.
Салтанатты іс-шарада сөз сөйлеген Ғаузез Нұрмұхамбетов білімге тең қолжетімділікті қамтамасыз ету – мемлекеттің басты басымдықтарының бірі екенін атап өтті. Ол соңғы жылдары облыста екі мыңнан астам оқушы орнына арналған алты жаңа мектеп салынғанын айтты. Бұл жобаларды жүзеге асыруда жеке кәсіпкерлер мен бизнес өкілдерінің үлесі зор екенін ерекше атап өтті. Еңбек ауылындағы жаңа мектеп те мемлекеттік-жекеменшік әріптестіктің және әлеуметтік жауапкершіліктің жарқын мысалы болды.
Облыс әкімінің бұл жұмыс сапары Солтүстік Қазақстандағы ауылдық аумақтардың дамуы бірнеше бағытта қатар жүріп жатқанын көрсетті. Жолдар мен көпірлерді жөндеу көлік қатынасын жақсартады, заманауи байланыс құрылғылары тұрғындарға тұрақты интернет пен сапалы байланыс ұсынады, ал жаңа мектептер балаларға сапалы білім алуға жағдай жасайды. Мұның бәрі ауыл тұрғындарының өмір сүру деңгейін арттыруға және болашақ ұрпақ үшін қолайлы орта қалыптастыруға бағытталған нақты қадамдар болып табылады.
