Солтүстік Қазақстан облысы – елдің аграрлық локомотиві. Өңір дәстүрлі түрде егіншілік пен мал шаруашылығында күшті. Осы бағыттардың дамуы дәнді дақылдар, майлы дақылдар мен ет өндірісінің елеулі үлесін қамтамасыз етіп, жыл сайын облыстың республикадағы агроөнеркәсіптік кешендегі позициясын нығайтуға мүмкіндік беруде, деп хабарлайды Social Media.
Облыстың ауыл шаруашылығы мақсатындағы жерлері 7,16 млн гектарды құрайды, бұл өңірдің жалпы аумағының шамамен 74%-ын қамтиды. Оның ішінде 6,94 млн гектар – ауыл шаруашылығы алқаптары, соның 4,98 млн гектары егістік, қалғаны жайылым. Бұл жерлерде 2876 шаруа және фермер қожалығы, 966 шаруашылық серіктестік және 29 ауыл шаруашылығы кооперативі жұмыс істейді.
2024 жылы ауыл шаруашылығының жалпы өнім көлемі 942,9 млрд теңгеге жетті. Оның ішінде өсімдік шаруашылығы 738,8 млрд теңгені құрады. 6,5 млн тонна дәнді дақыл жиналып, гектарынан 19,6 центнерден өнім алынды. Бұл – соңғы 13 жылдағы рекорд және СҚО-ны еліміздегі астық өндіруші облыстардың көшбасшысына шығарды. Майлы дақылдардың жалпы өнімі 787,4 мың тоннаны құрап, гектарынан 12,2 центнерден өнім алынды.
Мемлекет басшысының тапсырмасы аясында 2028 жылға қарай ауыл шаруашылығының жалпы өнім көлемін екі есеге арттыру, яғни 1,5 трлн теңгеге жеткізу көзделген. Бұл мақсатқа қол жеткізу үшін сала құрылымын әртараптандыру, рентабельді әрі сұранысқа ие дақылдарға басымдық беру жүзеге асырылуда.
Қазіргі жылы облыс бойынша егіс көлемі 4,3 млн гектарды құрады. Оның ішінде: дәнді дақылдар – 3,0 млн га, майлы дақылдар – 1,0 млн га, мал азығы – 392 мың га, картоп – 8,6 мың га, көкөніс – 1,4 мың га.
Сонымен қатар, су үнемдеу технологиялары енгізілуде: 2028 жылға қарай олардың аумағы 9,4 мың гектардан 17,9 мың гектарға дейін жеткізілмек. Биыл 340 мың тонна минералды тыңайтқыш сатып алынды.
Ауыл шаруашылығының тұрақтылығына сапалы тұқым ерекше ықпал етеді. Қазіргі таңда өңірде тұқым жаңарту деңгейі 11,2%-ды құрайды.
СҚО-да заманауи сүт-тауарлы фермалар салынуда, ауыл шаруашылығы техникасы жаңартылуда. Биыл 1613 бірлік техника 46,4 млрд теңгеге сатып алынды.
Мал шаруашылығында сүт бағытындағы фермалар белсенді дамуда. 42 заманауи МТФ жұмыс істейді, тағы 15-і салынып жатыр. «Зенченко и К» серіктестігі 8 мың басқа арналған ең ірі ферманы салуда, ол Орталық Азиядағы ең заманауи кешен болмақ.
Өңірде ет, сүт, ұн, майлы дақылдар мен макарон өнімдерін өңдейтін ондаған кәсіпорын жұмыс істейді. Олардың өнімдері Қазақстанда ғана емес, Ресей, Қырғызстан, Тәжікстан, Өзбекстан, Ауғанстан және Қытайға экспортталуда.
2025 жылы ауыл шаруашылығын мемлекеттік қолдау көлемі 75,6 млрд теңгені құрап, өткен жылмен салыстырғанда 24%-ға артты. Бұл қаражат өсімдік шаруашылығын, мал шаруашылығын дамытуға және басқа да бағыттарға бағытталды.
Солтүстік Қазақстан облысы агроөнеркәсіптік кешенді жаңғырту арқылы елдің азық-түлік қауіпсіздігін нығайтып, халықаралық нарыққа шығу әлеуетін арттыруда.
