Солтүстік Қазақстан облысының экология департаменті 9 айдағы бақылау-қадағалау қызметінің қорытындысын шығарды. Осы кезеңде ведомство 98 құқықбұзушылықты анықтады. 50 әкімшілік айыппұл салынып, олардың жалпы сомасы 32 миллион теңгеден асты, деп хабарлайды Social Media.
9 ай ішінде Экология департаменті 49 тексеріс жүргізді, олардың басым бөлігі – жоспардан тыс тексерістер. Негізгі себептер ретінде азаматтардың өтініштері мен прокуратураның талаптары аталды. Сондай-ақ бару арқылы және барусыз профилактикалық бақылаулар жүргізілді.
«2025 жылға профилактикалық бақылау барусыз түрде I және II санаттағы 218 объекті операторына қатысты жүзеге асырылады. Профилактикалық бақылау барусыз түрде жүргізілген жағдайда, егер бұзушылық анықталса да, әкімшілік құқық бұзушылық туралы іс қозғалмайды. Алайда профилактикалық бақылаудың нәтижелері бару арқылы профилактикалық бақылауды жүргізуге іріктеу үшін негіз болып табылады», – деп түсіндірді ведомствода.
Сондай-ақ мамандар Солтүстік Қазақстан облысы аумағында қалдықтарды рұқсатсыз орналастырудың алдын алу жөніндегі 2025–2026 жылдарға арналған жоспардың іске асырылуы туралы хабарлады. Оның аясында Экология департаменті, ішкі істер органдары және Табиғи ресурстар және табиғат пайдалануды реттеу басқармасы қызметкерлерінен құралған мобильді жұмыс тобы құрылды.
Жоспарды орындау шеңберінде мобильді топ Петропавл қаласы мен облыс аудандарына шығу жұмыстарын жүргізеді. Негізгі мақсат – қалдықтардың рұқсатсыз орналастырылған орындарын түгендеу және анықтау. Сондай-ақ рейдтер барысында анықталған құқықбұзушылықтар бойынша материалдар мен ақпарат алмасу қамтамасыз етіледі және тиісті шаралар қабылданады. Бұдан бөлек, халық пен кәсіпкерлік субъектілері арасында түсіндіру жұмыстары жүргізіледі. Азаматтарға рұқсатсыз қоқыс орындарын ұйымдастырғаны үшін жауапкершілік туралы және мұндай қалдықтардың қоршаған орта мен адамдардың денсаулығына кері әсері жөнінде түсіндіріледі.
«Мобильді жұмыс тобы сәуір мен шілде айлары аралығында 12 рет шығу жұмыстарын жүргізді. Нәтижесінде 64 рұқсатсыз қалдық орналастыру орны анықталды. Аталған орындарды жою және кінәлі тұлғаларды әкімшілік жауапкершілікке тарту мақсатында ақпарат жергілікті атқарушы және ішкі істер органдарына жолданды. Бұл бағыттағы жұмыс жалғасуда», – деп хабарлады Департамент.
Ведомство атап өткендей, жеке және заңды тұлғалар Қазақстан Республикасының экологиялық заңнамасының талаптарын қатаң сақтауға, сондай-ақ қоршаған ортаны қорғау жөніндегі шараларға жәрдемдесуге міндетті. Сонымен қатар әкімшілік немесе қылмыстық жауапкершілікке тарту экологиялық заңнама талаптарын бұзушылықтарды жою міндетінен босатпайды.
