Солтүстік Қазақстан облысында есірткі қылмысына және киберқатерлерге қарсы күрес бойынша жұмыс жалғасып жатыр, деп хабарлайды Social Media.
Жуырда полиция қызметкерлері Петропавл қаласының 19 жастағы тұрғынын ұстады. Тексеру барысында одан ұнтақ тәрізді заты бар 100 түйіншек тәркіленді. Сараптама нәтижесі бойынша, бұл – жалпы салмағы 98,64 грамм синтетикалық есірткі «мефедрон» екені анықталды.
Аталған факті бойынша қылмыстық іс қозғалып, тергеу жүргізілуде. Алдын ала болжам бойынша, жас жігіт тыйым салынған заттарды тарататын интернет-дүкендердің бірінде жұмыс істеген болуы мүмкін. Полиция еске салады: аса ірі көлемде есірткі сату үшін 7 жылдан 12 жылға дейін бас бостандығынан айыру жазасы қарастырылған.
Сонымен қатар СҚО полиция департаменті қазіргі қылмыстың жиі цифрлық ортаға ауысып жатқанын атап өтті. Онлайн-платформалар арқылы есірткі сату ғана емес, «дропперство» деп аталатын құбылыс та белең алуда – бұл өз есепшоттарын немесе банк карталарын алаяқтардың пайдалануы үшін беру арқылы заңсыз операцияларды жүргізуге көмектесу.
ДП СҚО киберқылмыспен күрес басқармасының аға жедел уәкілі Милена Балацкая түсіндіргендей, дропперлер алаяқтарға ұрланған қаражатты қолма-қол ақшаға айналдыруға немесе аударуға көмектесу арқылы қылмыстық схеманың қатысушысына айналады. Бұл – кибералаяқтардың тізбегіндегі негізгі буындардың бірі.
2025 жылғы 16 қыркүйектен бастап Қазақстанда Қылмыстық кодекске өзгерістер күшіне енеді. Енді дропперлік үшін де қылмыстық жауапкершілік қарастырылған: бөтен адамдарға өз шоттарына түскен қаражатты қабылдауға немесе банк карталарын рәсімдеп, оларды алаяқтарға беруге келісетін тұлғалар заң алдында жауап береді.
Осылайша, өңірде есірткі қылмыстарын анықтау және жолын кесу бойынша ғана емес, интернет-алаяқтықтың жаңа түрлерімен де жүйелі күрес жүргізілуде. Полиция азаматтарды мұндай әрекеттердің салдарын түсінуге шақырады: заңсыз схемаларға қатысу беделге нұқсан келтіріп қана қоймай, заң алдында жауапқа тартылуға және нақты бас бостандығынан айыруға әкелуі мүмкін.
