7-9 тамыз аралығында Солтүстік Қазақстан облысының Булаев қаласында жастар арасында облыстық «Жастар-2025» спартакиадасы өтті. Іс-шараға облыстың 13 ауданынан 325 қатысушы жиналып, олар алты спорт түрі бойынша бақ сынасты: еркін күрес, грек-рим күресі, мини-футбол, ерлер және әйелдер арасындағы жағажай волейболы, жеңіл атлетика, деп хабарлайды Social Media.
Спартакиаданың ашылуы қаланың орталық алаңында өтті. Оған мемлекеттік билік органдарының өкілдері, спортшылар, жаттықтырушылар және Булаев қаласының тұрғындары қатысты. Облыс әкімі аппаратының басшысы Руслан Алишев қатысушыларға арнаған сөзінде жастар арасында спортты дамытудың маңыздылығын атап өтті:
«Болашағымыз – жастардың қолында. Егер өскелең ұрпақ салауатты өмір салтын ұстанып, спортпен айналысса, еліміздегі құқықбұзушылықтар саны айтарлықтай азаяды. Бұл – қарқынды дамудың негізі. Қарсыласты құрметтей білу, жарыстың беделін арттыру және алға ұмтылу қажет», – деді Руслан Алишев.
Жарыстар белгіленген регламент бойынша өтті. Таңертең іріктеу кезеңдері, түстен кейін финалдық кездесулер мен медаль үшін сайыстар ұйымдастырылды. Үш күн бойы спорт нысандарындағы трибуналар өз аудандарының командаларын белсенді қолдаған көрермендерге толы болды.
Спартакиада қорытындысы бойынша жалпыкомандалық есепте 146 ұпай жинаған Мағжан Жұмабаев ауданы жеңіске жетті. Екінші орынды 127 ұпаймен Шал ақын ауданы, үшінші орынды 121 ұпаймен Қызылжар ауданы иеленді.
Ұйымдастырушылар спортшылардың жоғары дайындық деңгейін және төрешілер құрамының үйлесімді жұмысын атап өтті. Олардың айтуынша, «Жастар-2025» жарысын өткізу жастар арасында дене шынықтыруды нығайтуға, облыстағы спорттық дәстүрлерді дамытуға және салауатты өмір салтын қалыптастыруға ықпал етеді.
Облыстық спартакиадалар дәстүрі жалғасады: 2026 жылы жарыс Мамлют ауданында өтеді.
