Бүгінгі мақалама халықаралық жарыстардың бірнеше дүркін жеңімпазы және жүлдегері, әлем чемпионатына қатысушы Евгений Павловқа арналады. Петропавлдан шыққан жас спортшы кәсіби бокста 17 жастан бері жетістіктерге жетіп келеді. Оның таланты мен жарқын өнерін облыстың және Қазақстан ұлттық құрамасының үздік жаттықтырушылары байқап, жоғары бағалады. 25 жасында Женя – Қазақстан Республикасының бокстан спорт шебері, жасөспірімдер мен жастар арасында Қазақстан чемпионы, ересектер арасындағы Қазақстан чемпионатының күміс жүлдегері, кикбоксингтен төрт дүркін ел чемпионы, әлем және әлем кубогының жеңімпазы. Солтүстікқазақстандық боксшының мансабындағы тағы бір маңызды жетістік – WBA International белбеуін жеңіп алуы. Евгений Social Media тілшісіне спортқа қалай келгенін, қандай жетістіктерге жеткенін және болашаққа жоспарлары жайлы айтып берді.
Төбелесқұмар баладан боксшыға дейін
Евгений Павлов бала кезінен футбол және күреспен айналысқан. 2008 жылы досы Данияр оны Камиль Сафин атындағы бокс мектебіне шақырды, бірақ Евгений алғашында футболшы болуды армандағандықтан, бас тартты. Дегенмен қызығушылықпен бір жаттығуға қатысып көрді. Бірінші күні-ақ Женькаға бір жылдан бері бокспен айналысып жүрген спортшымен спаррингке шығу ұсынылды.
«Бұл идеяны жаттықтырушыға айтқан достарым мені бала кезден білетін. Ауладағы төбелестерде мен әрдайым көзге түсетінмін. Спаррингте жеңіске жеттім, бокстың негіздерін білмесем де. Бәлкім, маған жауынгерлік мінезім көмектескен шығар. Сол кездесуден кейін СҚО-ның жетекші жаттықтырушысы Денис Языков мені қолға алып, қолымды қалай ұстау керектігін, түрлі жаттығуларды қалай орындау қажеттігін үйрете бастады. Ол менің қабілетімді байқап, жаттығуға шақырды. Содан бері 17 жыл бойы кәсіби бокспен айналысып келемін», – дейді Евгений Павлов.
Бір айдан кейін Евгений алғашқы жарысына қатысты. Облыстық турнирде ол екінші орын алды, тәжірибелі ресейлік боксшыға жол берді. Алайда Женя жекпе-жектің нәтижесі әділ болмады деп есептейді: бірінші орынды Ресей спортшысына құрмет ретінде берген. Бұл жағдай Евгенийді қатты ренжітті және спортқа деген көзқарасын өзгертті. Көп уақыт пен күш жұмсап, арман мен мақсатқа ұмтылғанының бәрі бір сәтте құнсызданғандай көрінді. Ол бокстан алыстап кетуге шақ қалғанымен, өзіне жаңа мақсат қойып, жаттығуды жалғастыруға шешім қабылдады.
Төрт жылдан кейін Евгенийдің достары бірінен соң бірі бокс секциясынан кете бастады. Оған да сол ой келді – жылдар бойы бір нәрсемен айналысудан шаршағандай болды. Бірақ оны бұл қадамнан жаттықтырушысы қайтадан сақтап қалды. Денис Языков оның ата-анасымен сөйлесіп, кейде үйінен арнайы алып кететін. Спортшының айтуынша, бапкерінің табандылығы мен еңбегі оның спорттық мансабына үлкен әсер етті.
Жалпы білім беретін мектепті аяқтаған соң, Евгений Борки ауылындағы колледжге түсіп, токарь мамандығын меңгерді. Ол жиі жарыстарға кететіндіктен, мұғалімдері әрдайым түсіністік танытып, қолдау көрсетті. Осындай көмек арқасында Евгений спорт пен оқуды қатар алып жүрді. 2008 жылдан бастап, облыстық барлық турнирлерде жеңімпаз атанып келеді.
2012 жылы Евгений өз салмақ дәрежесінде жасөспірімдер арасында Қазақстан чемпионы атанып, спорт шеберлігіне кандидат болды.
2016 жылы Евгений Павлов Түркістан қаласында өткен Олимпиада чемпионы Бекзат Саттархановты еске алуға арналған жастар арасындағы халықаралық бокс турниріне қатысты. Солтүстікқазақстандық төрт жекпе-жекте жеңіске жетіп, спорт шебері атағын алды. Оның талантын ұлттық құраманың бас жаттықтырушысы Ғалым Кенжебаев байқап, Евгенийді Алматыдағы оқу-жаттығу жиындарына шақырды.
«Біз әлем чемпионатына дайындала бастадық. Көп жаттықтық, спаррингтер өткіздік. Мен ел чемпионымен жекпе-жекке шығып, оны төрт рет қатарынан жеңдім. Осылайша, әлем чемпионатына жолдама алдым. Санкт-Петербургте өткен әлем чемпионатында алғашқы жекпе-жекте кубалық боксшыға жол бердім. Бірақ жеңіліске қарамастан, ұлттық құрамамен жаттығуды жалғастырдым», – деп еске алады Евгений.
Кейін Евгений ересектер санатына өтіп, ұлттық құраманың үшінші нөмірлі боксшысы атанды. Мұнда жағдай қиындай түсті: баскиімді шешу керек болды, бұл жарақат алу қаупін арттырды. Сонымен қатар, тәжірибелі қарсыластармен кездесу де оңайға соқпады. 2018 жылы ересектер арасындағы Қазақстан чемпионатында ол қола жүлдеге ие болып, содан кейін кикбоксингке ауысу туралы шешім қабылдады. Оған ұлттық құрамада қаржылық қолдау болмағаны себеп болды.
Токио Олимпиадасына екінші рет өте алмағаннан кейін, Евгений Қазақстандағы талантты боксшылар мен ММА файтерлерін қолдайтын «SULEIMEN promotions» компаниясынан ұсыныс алды. Ол көп ойланбастан келісімшартқа қол қойып, кәсіби мансабында жаңа кезең бастады. Соңғы 5 жылда Евгений 10 жекпе-жек өткізіп, сегізінде қарсыласын нокаутпен жеңді.
Ол Беларусь, Қазақстан, Ресей, Мексика, АҚШ-та жекпе-жектерге шығып, WBA International белбеуін жеңіп алды. Қазір ол әлемдік рейтингтің ТОП-12 қатарына кіріп отыр.
«Мен әлі де мансабымның басындамын. Боксқа келгеніме еш өкінбеймін. Денсаулығым рұқсат бергенше, бокста боламын. Қазір менің басты мақсатым – кәсіби деңгейде жетістікке жету. Ал жеке өмір мен басқа нәрселер кейін келеді», – дейді Евгений.
Қазіргі таңда Евгений АҚШ-тың Уэст-Палм-Бич қаласында жаттығып, Олимпиада ойындарының финалисті Чарльз Мунидің жетекшілігінде дайындалуда. Оның жоспары – әлемдік деңгейде одан әрі танымал болу.
