Солтүстік Қазақстан облысының Қызылжар ауданында 2025 жылғы 10 тамызда жергілікті тұрғындар үшін тарихи оқиға – аудан әкімі алғаш рет тікелей сайлау арқылы таңдалды, деп хабарлайды Social Media.
Бұл – елдің саяси жүйесіндегі ауқымды өзгерістердің бір бөлігі. 2025 жылдан бастап Қазақстанда аудан және облыстық маңызы бар қала әкімдері тікелей дауыс беру арқылы сайлана бастады.
Қызылжар ауданындағы сайлау бұрынғы әкімнің өкілеттігін мерзімінен бұрын тоқтатуға байланысты тағайындалды. Дауыс беруге дайындық облыстық сайлау комиссиясы бекіткен күнтізбелік жоспарға және ҚР Орталық сайлау комиссиясының сайлау құжаттамасын әзірлеу мен пайдалану тәртібі туралы қаулысына сәйкес жүргізілді. Науқан барысы Қызылжар аудандық сайлау комиссиясының интернет-парақшасында жарияланып отырды.
Сайлау күні учаскелер таңғы сағат сегізде ашылды. Сол уақытта-ақ есік алдында өз азаматтық борышын орындауға асыққан ауыл тұрғындары жинала бастады. Жазғы науқан кезінде әрбір ашық күн бағалы болғанымен, сайлауға қатысу белсенділігі жоғары болды. 31 661 сайлаушының тізіміне енгізілгендердің 17 815-і дауыс берді. Оның ішінде бір сайлаушы – жолдама куәлігімен, ал 481 адам – үйінде немесе дауыс беру ғимаратынан тыс жерде дауыс берді.
Аудан әкімі лауазымына үш кандидат бақ сынады. Дауыс беру нәтижесінде Санат Аубакировты – 2 549 адам, Асқар Хабибулинді – 1 671 адам, ал ең көп дауыс – 11 771 – аудан әкімінің орынбасары қызметін атқарған Бейбіт Исманов жинады. «Барлығына қарсы» бағанын 1 310 сайлаушы таңдады.
1971 жылы туған Бейбіт Исманов сайлауда жеңіске жетіп, Қызылжар ауданының жаңа әкімі атанды. Оның сайлануы – жергілікті өзін-өзі басқару тарихындағы жаңа кезеңнің басталуы. Енді аудан басшысы мандатты тікелей халықтан алып, өңірдегі демократиялық процестердің нығаюының символына айналды.
