26 тамызда Солтүстік Қазақстан облысында қауіпсіздікті қамтамасыз етуге бағытталған ауқымды акция – «Құқықтық тәртіп» жедел-профилактикалық іс-шарасы басталды, деп хабарлайды Social Media.
Іс-шараның ашылуы гарнизондық саптық жиыннан басталды. Онда кезекшілікке шығатын қызметкерлер мен әскери қызметшілерді облыстық полиция департаментінің бастығы Айдын Қабдулдинов құттықтады. Ол қоғамдық тәртіпті сақтауда өзін жақсы қырынан көрсеткендерге алғысын білдіріп, ерекше көзге түскен әскери қызметшілерге алғыс хаттар табыстады. Марапатталғандардың қатарында мерзімді қызметтегі сарбаздар да болды, бұл әрбір қатысушының қауіпсіздік ісіне қосқан үлесінің маңыздылығын айқындады.
Қоғамдық тәртіпті күзетуге облыс орталығында патрульдік полиция батальонының, жедел әрекет ету арнайы жасағының, мамандандырылған күзет қызметі басқармасының қызметкерлері, сондай-ақ Ұлттық ұланның әскери қызметшілері жұмылдырылған. Күн сайын қала көшелеріне 500-ден астам құқық қорғау қызметкері шығып, өңір тұрғындары мен қонақтарының тыныштығын қамтамасыз етуде.
Айдын Қабдулдинов жеке құрамға арнаған сөзінде алдағы Конституция күні мерекесі тәртіп сақшыларынан жоғары жауапкершілікті және кез келген жағдайға жедел әрекет етуге дайын болуды талап ететінін атап өтті. «Сіздердің іс-әрекеттеріңіз азаматтардың өтініштеріне және шұғыл шақыртуларға дер кезінде әрекет етуге тікелей әсер етеді. Тұрғындар полиция олардың тыныштығын қорғайтынына, көшелерде тәртіпті сақтайтынына сенімді болуы тиіс. Қызметті қырағылықпен әрі мұқият атқарыңыздар, «Заң мен Тәртіп» қағидаттарына сүйеніп, кез келген құқықбұзушылыққа нөлдік төзімділік танытыңыздар», – деді облыстық полиция басшысы.
Саптық жиын аяқталған соң полиция мен әскери қызметшілер оркестр сүйемелдеуімен салтанатты шерумен жүріп өтті. Одан кейін әрқайсысы өз кезекшілігіне кірісіп, тәулік бойы қала тұрғындарының тыныштығын күзетуге аттанды.
Мемлекеттік мерекені дайындау және өткізу күндері өңір полицейлері күшейтілген тәртіпте қызмет атқаруда. Басты мақсат – Солтүстік Қазақстан облысының барлық тұрғыны мен қонағы үшін мерекенің тыныш әрі қауіпсіз өтуін қамтамасыз ету.
