Солтүстік Қазақстан облысында үлкен судың келуіне белсенді дайындалуда. Су тасқыны қаупі бар аймақта өңірдің 100-ден астам елді мекені бар. Олардың 19 Қызылжар ауданында орналасқан, деп хабарлайды Social Media.
ТЖМ 52859 әскери бөлімінің күшімен Қызылжар ауданының Бескөл және Тепличное ауылдарында қорғаныс бөгеттерін нығайту жұмыстары жалғасуда. 50 әскери қызметші мен 4 бірлік техника жұмылдырылды.
“Жұмыстар аясында 1900 дана қап дайындалды. 180 метр полипропилен төселді. Барлық іс-шаралар елді мекендерді Есіл өзенінің су тасқынынан қорғауға бағытталған. Жұмыс жалғасуда”, – деп хабарлайды облыстық ТЖ департаментінің баспасөз қызметі.
Қазіргі уақытта су тасқынын болжау және ықтимал төтенше жағдайларды модельдеу үшін қолданылатын маңызды жаңалықтардың бірі – «Тасқын» ақпараттық жүйесі. Ол Қазақстан үкіметі әзірлеген және стратегиялық шешімдер қабылдауға көмектесетін болады.
Айта кетейік, өткен жылғы су тасқыны өңірдің тарихындағы ең ірі су тасқынына айналды. 3 898 үйді су басты, оның 2 мыңнан астамы облыс орталығында.
