Дүниежүзілік денсаулық сақтау ұйымының бағалауына сәйкес, Қазақстан ана өлімінің төмендеу қарқыны бойынша әлемнің үздік 10 елінің қатарына енді. СҚО өткен жылдың қорытындысы бойынша мұндай қайғылы оқиғалар тіркелмеген өңірлердің қатарында, деп хабарлайды Social Media.
Бұл туралы Ұлттық экономика министрлігінде хабарлады. Олар соңғы 10 жылда елдегі ана өлімінің көрсеткіші пандемия жылдарындағы уақытша өсімге қарамастан, 2024 жылы 100 000 тірі туылған нәрестеге шаққанда 10,1 жағдайға дейін төмендегенін атап өтті. Бұл жүйелі шаралардың нәтижесі болды, атап айтқанда 25 жаңа клиникалық хаттаманы енгізу, 40-тан астам бейінді мамандардың қатысуымен телемедицинаны дамыту және босануға көмек көрсетудегі қиын жағдайлар бойынша сараптамалық кеңестер құру.
“Павлодар, Маңғыстау және Солтүстік Қазақстан облыстарында 2024 жылы ана өлімінің бірде-бір жағдайы тіркелмеген, ал білікті мамандар қабылдаған босану деңгейі 99,9%-ға жеткен. Бұл медициналық көмектің жоғары сапасын және жүзеге асырылып жатқан реформалардың тиімділігін көрсетеді”, – деп атап өтті министрлікте.
Медициналық кадрлардың, әсіресе босандыру және ауылдық жерлердегі тапшылығына қарамастан, мемлекет штатты кеңейтуге және еңбек жағдайларын жақсартуға белсенді түрде инвестициялауда.
“2024 жылдың қорытындысы бойынша дәрігерлердің тапшылығы 19%-ға, ал орта медициналық қызметкерлердің тапшылығы 7%-ға төмендеді, алайда мамандардың қала мен ауыл арасында біркелкі бөлінбеуі сақталып отыр. 2023 жылы алғашқы медициналық-санитарлық көмектің 92 нысаны салынды, 1600-ден астам жұмыс орны құрылды, ал заманауи техникамен жарақтандыру 86,7%-ға дейін өсті”, – деп хабарлады мамандар.
Өңірлерге мамандарды тартуға және денсаулық сақтаудың тұрақты дамуын қамтамасыз етуге қосымша қолдау шаралары – жеңілдікті кредиттерден бастап көтерме жәрдемақыға дейін көмектеседі.
