Петропавлда ерекше білім беру қажеттіліктері бар балалармен жұмыс істейтін мамандар, педагогтар мен сарапшылардың кездесуі өтті. Қатысушылар көкейкесті тақырыптарды, соның ішінде сәбилердегі аутизм мен психикалық бұзылуларды ерте диагностикалауға байланысты қиындықтарды талқылады. Диалог барысында жағдайды жақсартуға бағытталған бірқатар бастамалар айтылды, деп хабарлайды Social Media.
Аталған тақырыпты талқылауға ерекше балалардың ата-аналары да қатысты. Олардың сұрақтарына «AMANAT» партиясының хатшысы Шолпан Қаринова мен Парламент Мәжілісінің депутаты Үнзила Шапақ жауап берді.
«Менің балам» ҚБ жетекшісі Татьяна Ковалева атап өткендей, жаңартылған клиникалық хаттамаларға қарамастан, жалпы практика дәрігерлері, невропатологтар мен педиатрлар аутизм белгілерін ерте жастан танып, талдауға жібермейді және ерте араласуға бастамайды.
“Өмірінің алғашқы жылында педиатр баланың дамуындағы “қызыл жалаушаларды” байқауы мүмкін және байқауы тиіс. Бірақ, өкінішке қарай, бұлай болмайды. Ата-аналар тексеруден бас тартады, мамандарға жолдама жоқ, сауалнама жүргізілмейді. Біз құнды уақытты жоғалтудамыз”, – деді ол.
Ол ата-аналарға сауалнама жүргізуді және зерттеулердің кеңейтілген тізбесін қоса алғанда, денсаулық сақтаудың бастапқы буынында қолдануға міндетті біріздендірілген диагностикалық алгоритм енгізуді ұсынды.
“Бұл жерде заңдарға ешқандай өзгерістер енгізудің қажеті жоқ, бұл жерде атқарушы органдар деңгейінде шешу қажет. Іс жүзінде біз мүлде басқа картинамен бетпе-бет келеміз. Сондықтан біз партия деңгейінде осы мәселені шешуге қосылайық. Бұл сөзсіз шешілетін мәселе, бірақ ол мұқият талдауды және жүйелі тәсілді талап етеді. Кадрлар бойынша да, әдістемелер бойынша да, диагностикалық құралдар бойынша да мықты база болуы маңызды”, – деп атап өтті “AMANAT” партиясының хатшысы Шолпан Қаринова.
Диагностика мәселесінен басқа, кездесуге қатысушылар баланың диагнозымен бірінші болып бетпе-бет келетін ата-аналарды психологиялық және ақпараттық оқшаулау мәселесін көтерді. Өңірде Ерекше балалардың ата-аналарын қолдау мектебін құру бастамасын «Көмек» орталығының негізін қалаушы Ғалия Баязитова көтерді.
“Диагноз қойылғаннан кейін көптеген ата-аналар қорқынышпен, кінәлілікпен және шатастықпен жалғыз қалады. Біреулер қолын түсіреді, біреулер жұмыстан кетеді, біреулер отбасын бұзады. Бізге жүйелі, қауіпсіз, қолдаушы орта қажет”, – деп атап өтті ол.
Атап айтқанда, Мектеп бағдарламасы психологиялық және құқықтық көмекті, қолдау топтарын, онлайн-платформаны, тренингтерді және баламен және қоғаммен өзара іс-қимыл дағдыларын оқытуды көздейді. Сондай-ақ, әкелерді тарту және ата-ана бастамаларын дамыту көзделген.
Бұған дейін Шолпан Қаринова, Үнзила Шапақ және Президенттің ғылым және инновациялар жөніндегі кеңесшісі Күнсұлу Закарья «№2 психологиялық-педагогикалық түзету кабинеті» КММ және облыстық перинаталдық орталық жанындағы ерте араласу орталығының жұмысымен танысты. Онда делегациялар мекемелер жұмысының жаңа әдістемелері туралы айтып берді.
