Солтүстік Қазақстан облысында ер адам мас күйінде автокөлік тізгініне отырғаны үшін ірі көлемде айыппұл арқалады. Жүргізуші куәлігі жоқ азамат «Челябі – Новосібір» тас жолында полиция қызметкерлері тарапынан ұсталды, деп хабарлайды Social Media.
Құқықбұзушылық ісі ҚР Әкімшілік құқықбұзушылық туралы кодексінің 608-бабының 8-бөлігі бойынша Мағжан Жұмабаев ауданының сотында қаралды. Сот отырысында құқықбұзушы өз кінәсін толық мойындап, дәмханада бір кружка сыра ішкенін, кейін көлікке отырып үйіне бет алғанын түсіндірді. Алайда жолда оны тәртіп сақшылары тоқтатқан. Белгілі болғандай, ер адам бұрын-соңды жүргізуші куәлігін алмаған.
Соттың шешімімен оған 550 480 теңге көлемінде әкімшілік айыппұл салынды. Аталған қаулы әлі заңды күшіне енген жоқ.
