Солтүстік Қазақстан облысы әкімдігінің жұмыспен қамтуды үйлестіру және әлеуметтік бағдарламалар басқармасы халықтың әлеуметтік осал топтарын қолдауға және өмір сапасын арттыруға бағытталған бес әлеуметтік жобаның іске асырылып жатқанын хабарлайды. 2025 жылы тұрмыстық зорлық-зомбылық құрбандарына арнайы әлеуметтік қызметтер көрсету жобасы жалғасын тапты, деп хабарлайды Social Media.
Қызметтерге тұру орны, медициналық, психологиялық, құқықтық және өзге де көмек түрлері кіреді. Мақсат – зардап шеккендердің қоғамға бейімделуіне жәрдемдесу. Қызмет көрсетуші – «Әйелдерді қолдау орталығы» ҚБ. Жергілікті бюджеттен 32,4 млн теңге бөлініп, 20 адамды қамту жоспарланған.
Зейнеткер жастағы азаматтарға арналған «Белсенді ұзақ өмір сүру орталығы» жобасы аясында мәдени-танымдық, шығармашылық, оқу және сауықтыру шаралары ұйымдастырылады. Мақсат – белсенді өмір салтын насихаттау және әлеуметтік ортаға тарту. Қызмет көрсетуші – «Салауатты өмір салтын қолдайтын жастар» жастар қоғамдық бірлестігі. Бөлінген қаржы – 10,7 млн теңге, 250 адамды қамтиды.
Адам саудасының құрбандарына арналған жоба алты айға дейін уақытша тұрумен және психологиялық, физикалық жағдайын қалпына келтіруге бағытталған. Қызмет көрсетуші – «Әйелдерді қолдау орталығы» ҚБ. 2025 жылға бөлінген қаражат – 11,1 млн теңге, 10 адамға көмек көрсетіледі.
2021 жылдан бастап өңірде «TEN QOGAM» орталығы жұмыс істейді. Мұнда мүгедектігі бар адамдарға психологиялық және құқықтық көмек, әлеуметтік мәселелер бойынша кеңес беріледі, жұмысқа орналасуға жәрдем көрсетіледі. 2025 жылы жобаны «АРДОС-Жүрек» мүгедектер бірлестігі жүзеге асырады. 12,8 млн теңге қарастырылып отыр. 40 адамға кәсіби оқыту, 500 адамға кеңес беру, 25 адамды жұмысқа тарту көзделген. 1 мамыр 2025 жылға дейін 133 адам кеңес алып, 7 адам кәсіби оқытудан өтті.
Қандастар мен еңбек артықшылығы бар өңірлерден келген азаматтарға ақпараттық қолдау көрсету мақсатында Ақпараттық-консультациялық орталық жұмыс істейді. Орталық call-орталық ұйымдастырып, әлеуметтік желілерде парақшалар жүргізеді, бұқаралық ақпарат құралдарында ақпарат таратады, бос жұмыс орындары жәрмеңкелеріне қатысады және Петропавл қаласындағы кеңседе әлеуметтік, құқықтық, еңбек мәселелері бойынша көмек көрсетеді. Қызмет көрсетуші – «ТАУЕКЕЛ – көші-қонмен айналысатын ұйым» ҚБ. Бөлінген қаржы – 10,6 млн теңге.
Мемлекеттік әлеуметтік тапсырыс – әлеуметтік қызметтердің қолжетімділігін арттыру мен өңірдегі әлеуметтік тұрақтылықты нығайтудың тиімді құралы болып отыр.
