Солтүстік Қазақстан облысы Есіл ауданы Явленка ауылында жұмысшы мамандықтарының фестивалі өтті. Оның барысында 20 колледж өздерінің білім беру бағдарламаларын таныстырып, жастарға қажетті мамандықтар, жұмысқа орналасу перспективалары мен техникалық білім беру мүмкіндіктері туралы айтып берді, деп хабарлайды Social Media.
Фестиваль Жұмысшы кәсіптері жылына орайластырылды. Облыс әкімі Ғауез Нұрмұхамбетов колледждердің білікті кадрлар даярлаудағы мүмкіндіктерімен танысты.
“Бүгінде облыстың 15 колледжі 16 жаңа мамандық ашу бойынша жүйелі жұмыс жүргізуде, оның 14-і – жұмысшылар. Жақын арада егіншілер, тұқым өсірушілер, құс өсірушілер, наубайшылар және басқа да қажетті мамандарды даярлау басталады. Петропавлда жұмыс берушілердің қолдауымен мектептерде “автослесарь” және “электрик” бағыттары бойынша бейінді сыныптар құрылуда”, – деп атап өтті өңір басшысы.
Өңірде жұмысшы кадрлардың тапшылығы жағдайында жұмысшы мамандарды даярлауға мемлекеттік тапсырыс көлемін ұлғайту туралы шешім қабылданды – қосымша 105 грант бөлінді, нәтижесінде орындардың жалпы саны 1742-ге жетті. Айта кету керек, бүгінгі таңда түлектерді жұмысқа орналастыру мен жұмыспен қамту деңгейі 98%-ды құрайды.
Оқушыларды ерте кәсіптік бағдарлау үшін колледждерде «Junior Skills», «Кәсібінің үздігі» конкурстары, кәсіптік шеберлік чемпионаттары ұйымдастырылды. Олар 7 мыңға жуық түлекті қамтыды. 29 мың бала кәсіпорындарда болып, жұмыс барысын өз көздерімен көрді.
“WorldSkills өңірлік чемпионаты 3 мың жас кәсіпқойларды жинады. WorldSkills республикалық біріншілігінде біздің студенттер 2 алтын, 2 күміс және 3 қола медаль жеңіп алды. Жыл соңына дейін байқаулар, жұмысшы мамандықтардың жас көшбасшыларының форумы, шеберлік сыныптары, сондай-ақ жаңа мамандықтар атласын әзірлеу жоспарланған”, – деп хабарлады мамандар.
Бұл шаралардың барлығы жастардың жұмысшы мамандықтарға қызығушылығын оятып, оларға болашақ бағытты саналы түрде таңдауға және өңірдің мықты кадрлық іргетасын қалыптастыруға үлес қосуға көмектеседі.
