Петропавлда Солтүстік Қазақстан облысынан шыққан алғашқы әлем чемпионы, бокстан алтын медаль иегері Наталья Богданованы салтанатты түрде қарсы алды. Қаланың әуежайы нағыз мереке алаңына айналды: ту ұстап, гүл сыйлаған жанкүйерлердің қол шапалақтауы мен қуанышты жүздері спортшының жеңісті оралуын ерекше етіп көрсетті, деп хабарлайды Social Media.
26 жастағы Наталья Англияның Ливерпуль қаласынан оралды. Ол әлем чемпионатында 70 килограмға дейінгі салмақ дәрежесінде алтын медаль жеңіп алды. Бұл жетістік Солтүстік Қазақстан облысы тарихындағы ересектер арасындағы әлемдік біріншіліктегі алғашқы алтын болды.
Финалдық жекпе-жек турнирдің нағыз сәніне айналды. Натальяның қарсыласы австралиялық Лекиша Перголити болды. Қазақстандық боксшы жекпе-жектің алғашқы секундтарынан бастап басымдықты өз қолына алды. Бірінші раундты 5:0 есебімен таза жеңіске жетті. Екінші раундта да артықшылығын сақтап, үшінші раундта нәтижені түпкілікті бекітті. Төрешілер бірауыздан жеңісті біздің спортшыға берді.
Салтанатты қарсы алуға спорт басқармасының өкілдері, бапкерлер, команда әріптестері, жанкүйерлер мен облыс басшылығы қатысты. СҚО әкімінің орынбасары Жүсіп Жұмағұлов Натальяны құттықтап, былай деді:
«Бұл – біздің облыс үшін үлкен марапат. Біз тағы да дәлелдедік, жеріміз спортшыларға да, талантты адамдарға да бай. Наталья біздің туымызды әлемдік аренада көтерді».
Құттықтауларға облыстық дене шынықтыру және спорт басқармасының басшысы Қарлығаш Рамазанова да қосылды:
«Наталья, жеңісіңмен құттықтаймын! Сен солтүстікқазақстандық бокстың тарихын жазып жатырсың. Жас спортшылар сенің жолыңды жалғастырсын, ең бастысы – денсаулығың мықты болсын. Бұл жеңісің үшін алғыс айтамыз!»
Чемпион қыз өз әсерімен бөлісті:
«Эмоцияларымды сөзбен жеткізу қиын, әлі де әлем чемпионы атанғаныма сене алар емеспін. Мүмкін, мұны кейінірек түсінетін шығармын. Біз бапкеріммен үлкен жолдан өттік – қаншама оқу-жаттығу жиындары, ауыр еңбектер болды. Үйге сирек келдім, туғандарымды көрмедім. Бірақ қайда бара жатқанымды білдім, нәтижесінде алтын медальға қол жеткіздім».
Жеке бапкері Дастан Қабденов те қуанышын жасырмады:
«Біз әлем чемпионатынан алтын медаль алып келдік. Біздің аймақта намысты қолдан бермейтін спортшылардың бар екеніне қатты қуаныштымын. Олар облыстың да, елдің де намысын абыроймен қорғайды. Баршаңызға қолдау көрсеткендеріңіз үшін үлкен рахмет – біз оны жарыстарда да сезіндік».
Бұл жеңіс – тек Натальяның жеке жетістігі ғана емес, бүкіл солтүстікқазақстандық бокс үшін маңызды қадам. Бұл оқиға өңір спорты тарихындағы жаңа кезеңнің бастауы болды. Натальяның табысы жас спортшыларға шабыт беріп, табандылық пен еңбектің, өз-өзіне сенім мен туған жердің қолдауы арқасында әлемдік шыңдарды бағындыруға болатынын дәлелдеді.
