Мемлекеттік қызметтерді цифрландыру және олардың сапасын арттыру мақсатында «ЦОН» мобильді қосымшасында көлік құралдарын сатып алу-сату келісімшарттарын рәсімдеуге арналған жаңа сервис іске қосылды. Оны еліміздің барлық тұрғындары, соның ішінде солтүстікқазақстандықтар да пайдалана алады, деп хабарлайды Social Media.
Бұған дейін келісімшарт жасасу үшін азаматтар халыққа қызмет көрсету орталықтарына (ХҚКО) барып, QR-код арқылы жазбаша түрде рәсімдеуі қажет еді. Енді бұл процесс әлдеқайда жеңілдеді және ыңғайлы болды: келісімшартты «ЦОН» мобильді қосымшасындағы «Көлік сатып алу-сату келісімшарты» сервисі арқылы онлайн жасауға болады. Құжат автоматты түрде қалыптасып, сатушы мен сатып алушының электронды цифрлық қолтаңбаларымен (ЭЦҚ) қол қойылады.
«Осылайша, келісімшартты алдын ала, арнайы ХҚКО-ға бармай тұрып жасасуға болады, бұл қызмет алу уақытын айтарлықтай қысқартып, рәсімдеу процесін жеңілдетеді. Қосымшада рәсімделген келісімшартқа қол қойғаннан кейін оны көлік құралын тіркеу процедурасын аяқтау үшін СпецХҚКО-ға ұсыну қажет. Сонымен қатар, жасалған келісімшарт туралы жазба сервистің тарихында мәңгі сақталады, бұл ашықтықты қамтамасыз етеді және кейіннен тексеру мүмкіндігін береді», – деп атап өтті мамандар.
Құжаттың толық заңды күші қамтамасыз етіледі, жеке деректердің қорғалу деңгейі жоғары, ал енгізілген мәліметтердің автоматты түрде тексерілуі және сервистің мемлекеттік ақпараттық базалармен интеграциясы қателерді барынша азайтады. Бұл жалған құжат жасау, техникалық қателер мен келісімшартты рәсімдеу кезіндегі дәлсіздіктердің алдын алады. Бір келісімшартты рәсімдеу құны – небәрі 1 500 теңге.
«Еске салайық, сервиске қол жеткізу үшін «ЦОН» мобильді қосымшасында ЖСН және телефон нөмірі бойынша авторизациядан өту қажет. Сервис қосымша мүмкіндік болып табылады және азаматтар оны өз қалауы бойынша пайдалана алады», – деп атап өтті ХҚКО өкілдері.
Осылайша, «Көлік сатып алу-сату келісімшарты» сервисін енгізу мемлекеттік қызметтерді цифрландырудағы тағы бір қадам болып табылады және Қазақстан Республикасы азаматтары үшін ыңғайлы, қауіпсіз әрі ашық цифрлық орта құруға бағытталған.
