Солтүстік Қазақстан облысының әкімі Ғабит Мүсірепов атындағы ауданға жұмыс сапарымен барды. Бұл – өңірдегі халық саны бойынша ең ірі аудандардың бірі. Мұнда ауыл тұрғындарының өмір сапасын арттыруға, инфрақұрылымды дамытуға, шағын және орта бизнесті қолдауға, сондай-ақ агроөнеркәсіп кешенін өркендетуге бағытталған жүйелі жұмыстар атқарылып келеді, деп хабарлайды Social Media.
Сапар барысында өңір басшысы ірі инфрақұрылымдық жобалардың жүзеге асу барысымен танысты. Қазіргі уақытта Жезқазған–Петропавл республикалық маңызы бар автожолының аудан аумағынан өтетін 60 шақырымнан астам бөлігіне күрделі жөндеу жүргізілуде. Жыл соңына дейін Дружба–Ломоносовка және Ставрополка–Тоқсан би бағыттарында асфальт төсеу жұмыстары толық аяқталмақ. Барлығы ауданда ұзындығы 76 шақырымды құрайтын 13 жол жобасы іске асырылып жатыр.
Әкім атап өткендей, жолдардың сапасын сақтау мақсатында былтырдан бері жергілікті маңызы бар автожолдарға автокөліктерді автоматты түрде өлшейтін екі жүйе орнатылған. Биыл тағы бес кешен іске қосылады.
Ауданда бірқатар маңызды инвестициялық жобалар да жүзеге асуда. Соның ішінде басты жобалардың бірі – жылына 750 мың тонна өнім өндіретін «Новоишимский мелькомбинат» ЖШС-нің роботтандырылған құрамажем зауыты. Мұнда 45 жаңа жұмыс орны ашылған. Зауыт сынақ кезеңінде 50 мың тонна өнім өңдеп үлгерді.
Петропавл қаласында жұмыс істеп тұрған «Qyzyljar» арнайы экономикалық аймағы жоғары тиімділігін көрсетіп, облыстағы инвестициялық өсімнің негізгі драйверлерінің біріне айналды. Экономикалық әлеуетті кеңейту мақсатында Ғабит Мүсірепов атындағы аудан аумағында жаңа қосалқы аймақ ашу жоспарланып отыр. Оның аумағы бастапқыда 60 гектарды құрап, кейіннен 200 гектарға дейін ұлғайтылмақ.
Сапар барысында Ғауез Нұрмұхамбетов ауданның әлеуметтік жауапкершілікті кәсіпорындарының жұмысымен де танысты. Мәселен, «Ишим Гарант» ЖШС өз қызметкерлері үшін тұрғын үйлер салып берді. «Буденное СК» ЖШС де осындай бастаманы қолға алған. Барлық үйлер қажетті инженерлік инфрақұрылыммен жабдықталып, ауыл тұрғындары үшін қолайлы жағдай жасалуда.
Әкім Ефимовка ауылы маңында салынып жатқан «Буденное СК» ЖШС-нің 1200 басқа арналған жаңа сүт-тауарлы фермасының құрылысын аралап көрді. Жоба аяқталуға жақын. Кәсіпорын жылына 10 мың тонна сүт өндіруді жоспарлап отыр.
Сонымен қатар, өңір басшысы «Жаңа Есіл» теміржол вокзалының қайта жаңғыртылу жұмысын тексерді. Нысанды жөндеу биылғы жылдың соңына дейін аяқталады деп күтілуде. Әкім сондай-ақ күрделі жөндеуден өткен «Дюймовочка» балабақшасына барды.
Сапар аясында облыс әкімі бизнес өкілдерімен және ауыл шаруашылығы тауарын өндірушілермен кездесіп, егін орағының барысын талқылады.
«Мемлекеттік қолдаудың бұрын-соңды болмаған шараларының арқасында биыл жақсы өнім жиналды. Ендігі міндет – оны уақтылы әрі сапалы жинап алу. Ауданда орақ науқаны белсенді жүргізілуде. Көпжылдық шөптерді қоса алғанда, жиналатын алқаптың жалпы көлемі 700 мың гектардан асады», – деді өңір басшысы.
Жұмыс сапарының соңында аудан тұрғындарымен кездесу өтіп, олар өзекті мәселелерін мен ұсыныстарын айтты.
