Солтүстік Қазақстан облысы, Явленка ауылында «Ауыл әйелдері – ел мақтанышы» атты әйел-кәсіпкерлердің алғашқы форумы өтті, деп хабарлайды Social Media.
Ауылдық Мәдениет үйінде өткен іс-шараға жүзге жуық қатысушы мен қонақ жиналды. Олардың қатарында мемлекеттік органдардың өкілдері, «Ауыл» партиясының басшылығы, кәсіпкерлер, студенттер, ауыл еңбеккерлері және ардагерлер болды. Форум ауыл әйелдерінің қоғамдағы рөлінің өзектілігін айқындап, бұл тақырыптың түрлі әлеуметтік топтар үшін маңызды екенін көрсетті.
Іс-шараны Есіл ауданының әкімдігі, «Ауыл» партиясының облыстық филиалы және Қазақстан Республикасы Президенті жанындағы Әйелдер істері және отбасылық-демографиялық саясат жөніндегі ұлттық комиссия ұйымдастырды.
Форумға Қазақстан Республикасы Президенті жанындағы Әйелдер істері және отбасылық-демографиялық саясат жөніндегі ұлттық комиссияның мүшесі, «Ауыл» партиясы Орталық аппараты басшысының орынбасары Айгерім Сарсенбаева қатысты.
Форумды жергілікті әкімдік пен «Ауыл» партиясының облыстық филиалы «Даму» қоры, «Атамекен» ҰКП, облыстық өкпе аурулары орталығы және қоғамдық ұйымдардың қолдауымен ұйымдастырды. Мақсат – әйел-көшбасшыларды қолдау, ауылдағы кәсіпкерлікті дамыту, ұрпақтар сабақтастығын нығайту және салауатты өмір салтын насихаттау.
Қатысушылар алдында жергілікті әкім, партия өкілдері құттықтау сөз сөйледі. Олар әйелдердің отбасы ұйытқысы ғана емес, қоғамды өзгертетін және шабыттандыратын көшбасшы екендерін атап өтті.
«Ауыл» партиясы өңірлік филиалының кеңесшісі Рүстем Арманов партия бағдарламасы мен ауылды дамытудың жаңа бағыттарын таныстырды. Сондай-ақ жасанды интеллектті ауыл өміріне енгізу мүмкіндіктері туралы айтып, қатысушыларды заманауи өзгерістерге бейімделуге шақырды.
Форум аясында кәсіпкер әйелдердің өнімдері қойылған көрме, фотогалерея және пікірталас алаңдары ұйымдастырылды. «Даму» қоры мен «Атамекен» мамандары кәсіп бастау, мемлекеттік қолдау алу және экспорттық нарыққа шығу жолдары туралы кеңес берді. Денсаулық сақтау мамандары аурулардың алдын алу және салауатты өмір салтын насихаттау жөнінде түсіндірме жасады.
Шеберлік сабақтарында халықаралық бизнес-тренерлер шешендік өнер мен коммуникация дағдыларын дамыту бойынша практикалық жаттығулар өткізді. Айгерім Сарсенбаева әйел-көшбасшының жеке бренді мен заманауи бейнесі туралы баяндама жасап, дәстүр мен заманауи талаптарды үйлестіру маңызды екенін айтты.
Форум мерекелік концертпен және ортақ естелік суретке түсумен аяқталды. Қатысушылар жаңа байланыстар орнатып, ауыл әйелдерінің белсенділігін арттыруға бағытталған идеяларымен бөлісті.
Явленкадағы бұл форум СҚО ауылдарындағы әйелдердің қоғам дамуына қосатын үлесі зор екенін дәлелдеді. Олардың еңбекқорлығы мен энергиясы өңірдің әлеуетін арттыратын маңызды күш болып табылады.
