Солтүстік Қазақстан облысында жазғы мезгілде балаларды мектепке дайындауға бағытталған «Балақайлар мектебі» бағдарламасы кең көлемде жүзеге асырылып жатыр. Бұл бастама білім беру жүйесінің жаңа форматтағы, заман талабына сай жаңашыл шешімдерінің бірі болып отыр. Ата-аналардың қажеттіліктерін, балалардың мектепке дейінгі дайындық деңгейін және аймақтағы инфрақұрылымдық мүмкіндіктерді ескере отырып, өңірде қысқа мерзімді мектепалды оқыту жобасы өз жұмысын белсенді түрде жалғастыруда, деп хабарлайды Social Media.
Қазіргі таңда облыс аумағында аталған бағдарлама аясында 458 бала қамтылған. Бұл -өз баласын мектепке жан-жақты дайын күйде бергісі келетін көптеген ата-аналар үшін үлкен мүмкіндік. Өңірлік білім басқармасының алдын ала деректеріне сүйенсек, қыркүйек айында бағдарлама аясында 3 500-ге жуық баланың дайындық сыныптарына қабылдануы жоспарланып отыр. Бұл көрсеткіштің өзі бағдарламаға деген сұраныстың жоғары екендігін көрсетеді.
Сонымен қатар, тамыз айына жоспарланған жұмыстар аясында облыстағы 70 жалпы білім беру мектебі мен 8 мектепке дейінгі ұйымы «Балақайлар мектебі» бағдарламасын жүзеге асыруға белсенді түрде қатыспақ. Нәтижесінде, барлығы 84 арнайы ұйымдастырылған топта 1 360 балаға дейінгі мектепалды білім беріледі деп күтілуде. Бұл тек бір ай ішінде жүзеге асырылатын ауқымды жұмыс екенін ескерсек, бағдарлама облыстық деңгейде жақсы ұйымдастырылған және нақты құрылымдалған деуге толық негіз бар.
Бағдарламаның басты ерекшелігі -оқу процесінің қолжетімділігі мен баланың жастық ерекшеліктеріне бейімделген оқыту форматы. Балалар үшін сабақтар күн сайын 30 минут көлемінде өткізіледі, әр сабақ 10 минуттық үзілістермен қатар жүреді. Мұндай формат баланың жалықпауын, қызығушылығын жоғалтпауын және сабақты қабылдау қабілетінің жоғары болуын қамтамасыз етеді. Бұл – баланың мектептегі білім беру процесіне біртіндеп бейімделуіне жол ашатын тиімді әдіс.
Сабақтарды білікті бастауыш сынып мұғалімдері, сондай-ақ мектепалды даярлық бойынша тәжірибелі педагогтар жүргізеді. Бұл өз кезегінде білім сапасының жоғары болуын және оқыту барысында әр баланың жеке ерекшелігіне назар аударылуын қамтамасыз етеді. Сонымен қатар, педагогтар оқушылармен тығыз қарым-қатынас орната отырып, олардың бойындағы оқу мотивациясын арттырады.
Бағдарламаның мазмұны мемлекеттік жалпыға міндетті мектепке дейінгі тәрбие және оқыту стандартына толық сәйкес келеді. Ол тек академиялық біліммен шектелмей, кешенді дамытуды -атап айтқанда, физикалық, танымдық, коммуникативтік, шығармашылық және әлеуметтік-эмоционалдық қабілеттерді дамытуға бағытталған. Бұл тәсіл арқылы бала тек оқуға ғана емес, сонымен қатар ұжыммен жұмыс істеуге, өз ойын еркін жеткізуге, тәртіпке бағынуға үйренеді. Балаларда мектепке баруға деген оң көзқарас қалыптасып, жаңа ортаға деген қорқыныш сейіледі.
Бағдарлама аясында тек оқу процесі ғана емес, сонымен қатар түрлі ойын түрлері, шығармашылық тапсырмалар, қимыл-қозғалыс жаттығулары, сурет салу, ертегі тыңдау және кейіпкерлермен диалог жүргізу сынды әдістер кеңінен қолданылады. Мұның барлығы баланың жан-жақты дамуына, ойлау қабілетін жетілдіруге, сөздік қорын арттыруға және өзіне деген сенімділікті нығайтуға ықпал етеді.
Жалпы алғанда, «Балақайлар мектебі» – бұл тек жазғы дайындық емес, баланың өміріндегі маңызды кезеңге -мектеп табалдырығын алғаш аттауға жасалатын үлкен дайындық. Ата-аналар үшін бұл -баласының мектепке психологиялық, әлеуметтік және білімдік тұрғыдан толық дайын болуына сенімділік алуға мүмкіндік.
