Петропавл қаласында қалалық инфрақұрылымды ауқымды жаңарту жұмыстары жалғасуда. Солардың бірі – Қазақстан Конституциясы көшесі, қазір бұл көше түбегейлі жаңғыру үстінде, деп хабарлайды Social Media.
Жоба үш кезеңмен жүзеге асырылуда. Қазірдің өзінде бірқатар өзгерістер көзге көрінеді: тротуарларға жаңа плиткалар төселіп, көше бойына ыңғайлы орындықтар орнатылды, жас көшеттер отырғызылды, ал заманауи көше шамдары жайлы әрі қауіпсіз атмосфера қалыптастырып отыр. Жоспарланған 35 мың шаршы метр тротуар плиткасының шамамен 25 мыңы төселіп болды.
Тұрғындарды ақпараттандыру мақсатында ауа райы, уақыт пен бейнероликтер көрсетілетін сандық LED-экран орнатылды. Эстетикаға да ерекше назар аударылуда: орталық алаңда тәулік бойы жұмыс істейтін субұрқақ салынып жатыр. Оған түнгі уақытта ерекше көрініс беретін түрлі-түсті жарық шамдар орнатылады.
Бұл көше жаңа келбетке ие болумен қатар, функционалды жағынан да кеңейтіледі. Көше бойынан заманауи кафелер ашылады, ал қазіргі жұмыс істеп тұрған қоғамдық тамақтану орындары капиталды жөндеуден өтеді. Жобаның толық аяқталуы осы жылдың соңына жоспарланғанымен, жазғы террасса келесі жылдың басында іске қосылады деп отыр мердігерлер.
Қалада жүргізіліп жатқан жұмыстармен қатар ауылдық жерлерде де маңызды жобалар іске асырылуда. Облыс әкімі Гауез Нұрмұхамбетов Қызылжар ауданына барып, Тепличное және Прибрежное ауылдарындағы қорғаныс нысандарының құрылыс барысымен танысты. Мұнда көктемгі су тасқынынан қорғау мақсатында бетон плиталар төселуде. Екі ауқымды жобаның жалпы құны 6 миллиард теңгеден асады. Әкім жұмыстың сапасы мен мерзіміне ерекше назар аударды: барлық жұмыс биылғы жылы аяқталуы тиіс, келесі жылға қалдырылмай.
Назардан тыс қалмаған тағы бір ірі нысан – Универсальная көшесіндегі жол өткелі. Бұл нысан Петропавл орталығын жұмысшы кентімен байланыстырып, теміржолдан қауіпсіз өтуге мүмкіндік береді. Құрылыстың құны 5 миллиард теңгеден асты. Жоба 2023 жылы басталған және жоспарға сәйкес жүріп жатыр.
Береке шағынауданы да кезең-кезеңімен жаңарып келеді. Мұнда өткен жылдан бастап Малая көшесінің жол жабынына күрделі жөндеу жұмыстары жүргізілуде. Жұмыстың 60%-ы орындалды. Облыс әкімі жұмысқа жауапкершілікпен қаралып жатқанын атап өтті.
Транспорттық және инженерлік инфрақұрылыммен қатар, Береке шағынауданында маңызды әлеуметтік жоба жүзеге асырылуда – бұл 600 оқушыға арналған жаңа мектептің құрылысы. Жоба «Жайлы мектеп» ұлттық жобасы аясында, Президенттің тапсырмасымен іске асырылуда. Мектеп ғимараты 92%-ға дайын, нысан алдағы апталарда тапсырылады деп күтілуде. Ғимаратта кең оқу кабинеттері, компьютерлік сыныптар, спорт залы, конференц-зал, кітапхана және асхана қарастырылған. 5 миллиард теңге көлеміндегі қаржы – шетелге заңсыз шығарылып, мемлекетке қайтарылған активтер есебінен бөлінген.
Аталған барлық жобалар өңірдің кешенді дамуға бет алғанын көрсетеді. Жергілікті билік тек қаланың эстетикалық келбетін ғана емес, сонымен қатар тұрғындар үшін жайлы және қауіпсіз орта қалыптастыруға да ерекше назар аударып отыр.
