Солтүстік Қазақстан облысы Аққайың ауданына қарасты Дайындық ауылының маңындағы егістік алқаптарында мал азығын дайындау мәселелеріне арналған «АгроФид-2025» атты көшпелі семинар-кеңес ұйымдастырылды. Аталған іс-шара агроөнеркәсіп кешенін дамытуға бағытталған өзекті мәселелерді талқылауға арналған маңызды алаңға айналды, деп хабарлайды Social Media.
Семинар жұмысына жергілікті атқарушы органдардың өкілдері, ауыл шаруашылығы саласының мамандары, ғалымдар, сондай-ақ ауыл шаруашылығы техникалары мен агрохимиялық өнім жеткізуші компаниялардың өкілдері қатысты. Бұл – жай ғана тәжірибе алмасу емес, солтүстік өңірінің ерекшеліктерін ескере отырып, мал шаруашылығының тиімділігін арттыруға арналған жүйелі тәсілдерді қарастыруға бағытталған кең көлемді диалог алаңы.
Іс-шараның ресми ашылуында сөз сөйлеген Солтүстік Қазақстан облысы әкімінің бірінші орынбасары Марат Тасмағанбетов алдағы қыс мезгіліне дайындық аясында жем-шөп қорын уақтылы және сапалы дайындаудың маңыздылығына ерекше тоқталды. Оның айтуынша, бұл мәселе әсіресе орта және шағын шаруашылықтар үшін аса маңызды. Корм тапшылығы – мал басының кемуіне, өнімділіктің төмендеуіне алып келетін негізгі факторлардың бірі. Сондықтан әрбір шаруашылық алдын ала жан-жақты қамдануы қажет.
Семинар барысында Солтүстік Қазақстан мал шаруашылығы ғылыми-зерттеу институтының басқарма төрағасы Алтынбек Абдуллаев мазмұнды баяндама жасап, өңірдің көпжылдық тәжірибесінде протеинге бай мал азығының жетіспеушілігі жиі байқалатынын атап өтті. Ол аграрийлерді жем-шөп дақылдарының алқаптарын әртараптандыруға, жаңа технологияларды батыл енгізуге, сондай-ақ табиғи шабындық пен жайылымдардың әлеуетін тиімді пайдалануға шақырды. Ғалымның айтуынша, СҚО аумағында өсетін табиғи шөптер құнарлылығы жағынан жоғары, алайда оларды жүйелі түрде пайдалану үшін ғылыми негізделген тәсіл қажет.
Семинар аясында ауыл шаруашылығы техникалары мен агрохимия өнімдерінің үлгілері ұсынылған далалық көрме ұйымдастырылды. Бұл көрме қатысушыларға заманауи технологиялармен танысуға, әртүрлі өндірушілердің техникаларын салыстыруға, сондай-ақ жаңа шешімдерді нақты жағдайға бейімдеуге мүмкіндік берді. Көрмеге республикалық және халықаралық деңгейде жұмыс істейтін компаниялар өз өнімдерін әкелді.
Атап айтқанда, Петропавл қаласынан келген «EZS Group» компаниясы еуропалық өндірістегі техникаларды – италиялық пресс-подборщиктерді, чехиялық дән үгіткіштерді және польшалық шөп шапқыштарды ұсынды. Компания өкілі Динара Райымқұлованың айтуынша, бұл техника Қазақстанның дала жағдайында ұзақмерзімді әрі сенімді жұмыс істеуге арналған.
Агрохимиялық өнім өндіруші ретінде ауыл шаруашылығы саласында 15 жылдан астам еңбек етіп келе жатқан «Щелково Агрохим-KZ» компаниясы да өз өнімдерін ұсынды. Бүгінгі таңда бұл компанияның препараттарын еліміздің 150-ден астам шаруашылығы тұрақты түрде қолданады. Сату бөлімінің жетекші менеджері Уәлихан Ысқақов «Скарлет» және «Титул ДУО» сынды инновациялық протравительдер мен фунгицидтердің артықшылықтарына тоқталды. Айта кетерлігі, «Титул ДУО» препараты республикалық бюджет есебінен субсидияланатындықтан, бұл өнім отандық аграрийлер үшін өте тиімді.
Семинар қатысушылары Тайынша ауданындағы «Астық-STEM» ЖШС-нің тәжірибесіне де ерекше қызығушылық танытты. Аталған шаруашылық 22 мың гектардан астам ауыл шаруашылығы жеріне иелік етеді. Оның бір бөлігі тамшылатып және айналмалы суару жүйесі арқылы игерілуде. Шаруашылық директоры Сергей Звольский Беларусь елінің тәжірибесіне сүйене отырып, жүгері пастасын дайындау технологиясын енгізгендерін атап өтті. Оның айтуынша, бұл қоспа дойылған сиырлардың тәуліктік сүт өнімділігін 30 литрге дейін жеткізуге мүмкіндік берген.
Сонымен қатар Звольский мемлекеттік қолдаудың маңыздылығына да ерекше тоқталды. Оның айтуынша, бүгінгі таңда заманауи техника мен суару жүйелерін сатып алуға жұмсалатын шығынның 80 пайызына дейін субсидияланады. Бұл өз кезегінде шаруашылықтардың шығындарын азайтып, жалпы өндірістің рентабельділігін арттыруға зор ықпал етеді.
Семинардың практикалық бөлігінде жоңышқа шабу, жүгеріні сүрлемге салу және жасыл масса дайындау үдерісі көрсетілді. Іс-шара пленарлық отырыспен қорытындыланды, онда қатысушылар жайылымдарды тиімді пайдалану, жем-шөп дайындау мен сақтау технологияларын жетілдіру, азықтың қоректік құндылығын арттыру мәселелерін кеңінен талқылады.
Облыстық ауыл шаруашылығы басқармасының мәліметінше, алдағы қыс маусымына дейін өңір аграрийлері шамамен 1 миллион тонна шөп, 235 мың тоннадан астам сүрлем, 280 мың тоннадай силос, сондай-ақ қомақты көлемде сабан мен жем-шөптік дән әзірлеуі қажет. Қазіргі таңда шөптің 700 мың тоннадан астамы, яғни жоспардың 76 пайызы дайындалған.
Осындай ауқымды әрі мазмұнды семинарлар – ауыл шаруашылығы саласындағы білім мен тәжірибе алмасудың тиімді алаңы. Олар аграрийлерге өз ісіне жаңаша көзқараспен қарап, саланы одан әрі дамытуға тың серпін береді. Солтүстік өңірдің күрделі климаттық жағдайларына қарамастан, дұрыс бағыт таңдалып, ғылыми негізделген шешімдер қабылданса, мал азығын дайындау саласында үлкен жетістіктерге қол жеткізуге болады.
