Әрбір қоғам өзінің өткенінен ғана емес, болашағына қалай қарайтынымен де бағаланады. Ал болашақ – бұл жастар. Жастар – ертеңгі күнді қалыптастыратын, инновацияларды енгізетін, мәдениетті дамытатын және елдің алдағы дамуына әсер ететін шешімдер қабылдайтын күш, деп хабарлайды Social Media.
Бүгінгі таңда жастар көптеген қиындықтарға тап болуда: ақпараттың жеткіліксіздігі, мамандық таңдаудағы қиындықтар, жұмысқа орналасудағы кедергілер, тәлімгерлік пен өзін-өзі жүзеге асыруға арналған ресурстардың жетіспеушілігі. Осындай жағдайда жастарды қолдайтын, олардың қабілеттерін дамытып, идеяларын жүзеге асыруға мүмкіндік беретін орталықтардың болуы аса маңызды. Мұндай кеңістікке Жастар ресурстық орталықтары айналды.
ЖРО – бұл тек мекеме ғана емес, мемлекеттік бағдарламаларды, білім беру ұйымдарын, бизнес-секторды және қоғамдық бастамаларды біріктіретін жүйе. Олар жастарға өзін-өзі дамыту, кәсіби өсім және әлеуметтік белсенділік үшін платформа ұсынады. Негізгі қағида – қолжетімділік.
Әлеуметтік жағдайына, білім деңгейіне немесе тәжірибесіне қарамастан, кез келген жас адам ЖРО-ға жүгініп, қолдау ала алады. ЖРО қызметінің негізгі бағыттарына білім беру тренингтері, кәсіби бағдар беру, жұмысқа орналасуға жәрдемдесу, волонтерлік қозғалысты дамыту, NEET санатындағы жастарды қолдау, құқық бұзушылықтың алдын алу және салауатты өмір салтын насихаттау жатады.
Солтүстік Қазақстан облысында 14 ЖРО жұмыс істейді, олардың 13-і аудандарда, 1-еуі Петропавл қаласында орналасқан. Олардың қызметін Солтүстік Қазақстан облысы әкімдігінің Ішкі саясат басқармасына қарасты Қоғамдық даму және ақпарат орталығы үйлестіреді. Бұл орталық жанында жастар бастамаларын қолдау бөлімі жұмыс істейді. Сондай-ақ, еріктілер ұйымдарымен жұмыс істейтін өңірлік фронт-офис қызмет етеді.
ЖРО қызметі жастардың кең ауқымын қамтиды. Мектеп оқушылары мен студенттерге мамандық таңдауға көмек көрсетіледі, олар білім беру бағдарламаларына қатысады және көшбасшылық қабілеттерін дамытады. Бұл кәсіби бағдар тестілеуін, түрлі сала мамандарымен кеңесуді, сондай-ақ қажетті дағдыларды дамытуға арналған шеберлік сабақтары мен семинарларды қамтиды.
Жас мамандар үшін біліктілікті арттыру курстары, мансаптық өсім бойынша тренингтер және тағылымдамалар ұйымдастырылады. ЖРО тәжірибелі мамандармен тәлімгерлік бағдарламалар өткізіп, жас мамандардың кәсіби ортаға бейімделуіне және табысты мансап құруына көмектеседі.
NEET санатындағы жастар жұмысқа орналасуға қатысты кеңес алып, әлеуметтену және қоғамдық өмірге араласуға қолдау табады. Бұл бағытта әлеуметтік дағдыларды дамыту, мотивацияны арттыру, өзін-өзі сенімді ұстау және кәсіпкерлік пен қаржылық сауаттылықты үйретуге арналған арнайы бағдарламалар жүзеге асырылады.
Жастар ұйымдарына бастамаларды жүзеге асыруға, іс-шаралар өткізуге және гранттық бағдарламаларға қатысуға қолдау көрсетіледі. ЖРО ақпараттық және әдістемелік қолдау ұсынып, жобаларды дайындауға, қаржыландыру көздерін табуға көмектеседі, сондай-ақ жобаларды басқару мен командалық жұмыс бойынша оқыту семинарларын өткізеді.
Еріктілер үшін ЖРО – бұл әлеуметтік жобаларға қатысуға, өзін-өзі жүзеге асыруға және жеке дамуға мүмкіндік. Волонтерлік қызмет жастардың тәжірибе жинауына, көшбасшылық пен коммуникативтік дағдыларын дамытуына, сондай-ақ өңірдегі әлеуметтік мәселелерді шешуге атсалысуына жол ашады.
ЖРО аясындағы маңызды бағыттардың бірі – жастардың дамуына ықпал ететін іс-шараларды ұйымдастыру. 2024 жылы 2316 іс-шара өткізіліп, оған 82 мыңнан астам адам қатысты. Бұл шаралар білім беру, мәдениет, спорт, форумдар, конференциялар, бос жұмыс орындары жәрмеңкелері, ақпараттық кездесулер мен дәрістерді қамтиды.
Білім беру және ағартушылық бағдарламалар жеке даму, қаржы, бизнес, ақпараттық қауіпсіздік бойынша тренингтерді қамтиды. Бұл жастардың еңбек нарығындағы бәсекеге қабілеттілігін арттырып, сыни ойлау мен мәселе шешу дағдыларын дамытады. Мәдени және спорттық іс-шаралар – музыкалық фестивальдер, байқаулар мен жарыстар – салауатты өмір салтын насихаттайды.
Форумдар мен конференциялар жастар саясаты мен азаматтық қоғам мәселелерін талқылауға, тәжірибе алмасуға мүмкіндік береді. Мұндай шараларға қатысу арқылы жастар өз пікірін білдіріп, әлеуметтік мәселелер бойынша шешім ұсынып, пайдалы байланыстар орната алады.
Бос жұмыс орындары жәрмеңкелері жұмыс берушілермен тікелей байланыс орнатуға мүмкіндік береді. Компаниялармен танысу, талаптармен танысу және өз-өзін көрсету арқылы жастар нақты жұмыс мүмкіндіктерін иелене алады. Ақпараттық кездесулер мен дәрістер дін, құқықтық сауаттылық, құқық бұзушылық пен сыбайлас жемқорлықтың алдын алу мәселелеріне арналады.
Мұндай іс-шаралар жастардың адамгершілік құндылықтарын, құқықтық мәдениетін және жауапкершілігін қалыптастырады. 2025 жылдың басынан бері 122 іс-шара өткізіліп, тренингтер, форумдар, мәдени және спорттық кездесулер қамтылды. Бұл – ЖРО жұмысының динамикалық және белсенді екенін көрсетеді.
Еріктілік – ЖРО жұмысының маңызды бөлігі. СҚО бойынша 15 волонтерлік клуб жұмыс істейді, олар 10 мыңнан астам белсенділерді біріктіреді. Жұмыс 18 бағыт бойынша жүргізіледі: әлеуметтік, медициналық, экологиялық, археологиялық, IT-волонтерлік және тағы басқалар.
2024 жылы 2589-дан астам волонтерлік іс-шара өтті: ағаш отырғызу, аумақтарды тазарту, қоршаған ортаны қорғау, мұқтаж жандарға көмек, төтенше жағдайлардың салдарын жою, іздестіру-құтқару жұмыстары жүргізілді.
Экологиялық акцияларға ағаш отырғызу, өзендер мен ормандарды тазарту, қоқысты сұрыптау бойынша тренингтер кіреді. Бұл шаралар экологиялық мәдениетті арттыруға және табиғи ресурстарды сақтауға ықпал етеді. Мұқтаж жандарға көмек – зейнеткерлер, жетім балалар, мүгедектігі бар адамдарды қолдау. Волонтерлер гуманитарлық көмек жинап, таратып, нақты көмек көрсетеді.
Төтенше жағдайлардың салдарын жою – құтқару жұмыстарынан бастап алғашқы көмек көрсету, уақытша баспана ұйымдастыру, қажетті ресурстармен қамтамасыз ету. Іздестіру-құтқару шаралары – әсіресе қиын жететін аудандарда жоғалған адамдарды іздеу, мұнда волонтерлердің жеделдігі мен үйлесімділігі аса маңызды.
ЖРО құқық бұзушылықтың алдын алуға да белсенді қатысады. Құқықтық сауаттылықты арттыру, заңсыз әрекеттердің салдарын түсіндіру және жауапкершілік сезімін қалыптастыруға арналған дәрістер мен семинарлар өткізіледі. Орталық мамандары құқық қорғау органдарымен, білім беру мекемелерімен және ата-аналармен тығыз байланыста жұмыс істейді.
ЖРО-ның тағы бір маңызды бағыты – жастар бастамаларын қолдау. Жоба дайындау, серіктестер табу, қаржыландыру көздерін іздеу, жобалық менеджмент бойынша оқыту – мұның бәрі жастарға өз идеяларын іске асыруға және өңір дамуына үлес қосуға мүмкіндік береді.
ЖРО салауатты өмір салтын насихаттауға да үлес қосады: спорттық жарыстар, фитнес бағдарламалар, марафондар өткізіліп, зиянды әдеттерден аулақ болуға үндейді. Темекі шегу, ішімдік пен есірткіден бас тарту, белсенді әрі салауатты өмірді таңдау – жастарды ынталандырудың басты мақсаты.
Білім беру ұйымдарымен ынтымақтастық – ЖРО жұмысының тағы бір маңызды бағыты. Ашық есік күндері, мамандық иелерімен кездесулер, кәсіби бағыттағы тәжірибелік сабақтар мен тағылымдамалар арқылы жастар нақты жұмыс тәжірибесін жинақтап, болашақ жолын анықтай алады.
ЖРО заманауи технологияларды қолданып, әлеуметтік желілер арқылы ақпарат таратады, жетістіктерімен бөліседі және жаңа қатысушыларды тартады. Сондай-ақ орталықтар инфрақұрылымды жақсартып, жастар үшін жайлы әрі заманауи орта құруда.
Алдағы уақытта ЖРО көрсетілетін қызмет түрлерін кеңейтіп, стартаптар мен кәсіпкерлік қабілеттерді дамытуға, шығармашылықты қолдауға ерекше көңіл бөледі. Мемлекеттік және жекеменшік ұйымдармен, оқу орындарымен және қоғамдық бірлестіктермен серіктестікті нығайту – басты бағыт.
Осылайша, Солтүстік Қазақстан облысының ЖРО – жастарды қолдаудың, білім берудің, өз қабілеттерін іске асырудың және кәсіби дамудың маңызды алаңы. Олар жастардың белсенді, жауапты және ел болашағына үлес қосуға дайын буынын қалыптастыруда үлкен рөл атқарады.
