Бүгін Қозыбаев университетінде тарихи мәнге ие маңызды оқиға өтті. Оқу орны өзінің халықаралық беделін одан әрі нығайту мақсатында Түркиядағы жетекші халықаралық білім беру компаниясы — Eurostar Overseas Education Consultancy-мен ынтымақтастық жөнінде ресми келісімге қол қойды. Бұл қадам университеттің шекарадан тыс беделін арттырып қана қоймай, Солтүстік Қазақстан облысының білім беру саласындағы халықаралық байланыстарын жаңа деңгейге көтереді, деп хабарлайды Social Media.
Eurostar Overseas Education Consultancy — халықаралық білім беру саласында 20 жылдан астам табысты тәжірибесі бар, әлемнің түкпір-түкпірінде сенімді серіктестер желісін қалыптастырған, білікті әрі беделді компания. Ол мыңдаған жасқа өз армандарын жүзеге асыруға, ең үздік университеттерде оқуға мүмкіндік беріп келеді. Компания студенттерге жеке академиялық кеңес беруден бастап, шетелде оқу бағдарламаларын ұйымдастыруға дейінгі барлық кезеңде жан-жақты қолдау көрсетеді.
Жаңа келісімнің арқасында жыл сайын Түркия мектептерінің 100 үздік түлегі Петропавлға келіп, өздерінің жоғары білім алу жолын дәл осы жерден бастайды. Олар алғашқы жылын Foundation факультетінде өткізіп, ағылшын тілін қарқынды түрде меңгереді, сонымен қатар алдағы оқу жылдарында Аризона университетінің қос дипломдық бағдарламаларына түсуге дайындалады. Бұл бағдарлама түлектерге бір мезгілде екі елдің дипломын алу арқылы әлемдік деңгейде мойындалған маман болуға жол ашады.
Биылдың өзінде Аризона университетімен бірлесіп жүзеге асырылып жатқан бағдарламаларға 350-ден астам студент түсті. Олардың 153-і қос диплом жүйесін таңдады — бұл жастардың халықаралық білім алу мүмкіндіктеріне деген үлкен қызығушылығының айқын көрінісі.
Қозыбаев университеті бүгінде Қытайдан, АҚШ-тан, енді міне Түркиядан да студенттерді қабылдап отыр. Бұл — оқу орнының жаһандық білім беру кеңістігінің белсенді әрі беделді ойыншысы екенін дәлелдейді. Мұндай серіктестіктер Солтүстік Қазақстан өңірінің халықаралық танымалдығын арттырып, жастардың жаңа буынын тәрбиелеуде зор үлес қосады.
