Солтүстік Қазақстан облысы «World Clean Up Day» халықаралық экологиялық акциясына қосылды. Аймақ бойынша ауқымды сенбіліктер мен көгалдандыру шаралары өтіп, шамамен 10 мың адамды біріктірді, деп хабарлайды Social Media.
Мемлекет басшысы «Таза Қазақстан» жалпыұлттық науқаны аясында экологиялық тәрбие мен елді көгалдандырудың маңыздылығын бірнеше рет атап өткен болатын. Осы идеяны қолдау мақсатында СҚО тұрғындары жаппай аумақтарын тазалау және абаттандыру жұмыстарына шықты.
Акцияға ондаған ұйым, студенттер, еріктілер, депутаттар, Қазақстан халқы Ассамблеясының мүшелері, түрлі меншік нысанындағы кәсіпорындар өкілдері, ПИК/ОСИ, сондай-ақ бейжай қарамайтын тұрғындар қатысты. Шара барысында көгалдандыруға ерекше көңіл бөлінді. Жаңа скверлерде, су тасқынынан кейін бұзылған үйлердің орнына көшеттер отырғызылды.
«Барлық ұжымдар қаланы таза әрі жасыл етуге мүмкіндік алғанына қуана үн қосты. Бет-жүзін бұрмай, белсенді қатысқан баршаға алғыс айтамыз. Жалпы қала бойынша бүгін шамамен 1500 түп ағаш отырғызу жоспарланып отыр. Бірге күш салсақ, қаламызды да, облысымызды да таза, жасыл әрі жайлы етеміз деп сенемін», – деді облыс әкімінің орынбасары Нұрлан Кеңесов.
Акция жас ерекшелігі мен мамандығына қарамастан адамдарды біріктірді – студенттерден бастап кәсіпорын қызметкерлеріне, мемлекеттік қызметшілерге және зейнеткерлерге дейін. Әркім өз үлесін қосуға тырысты, ешкім сыртта қалғысы келмеді. Аула-аймақтарда да жұмыс қызды – тұрғындар өздері қоқыс жинап, сыпырып, аумақты ретке келтірді.
«Біз көршілерімізбен алдын ала келісіп алдық – кім қоқыс жинайды, кім бұтақ кеседі. Таңертеңнен шықтық. Ауламыздың таза болғанын қалаймыз. Мұндай акциялар шабыт береді – жалғыз емес екеніңді, айналада да бейжай қарамайтын адамдар бар екенін сезінесің», – деді петропавлдық тұрғын Айгүл Сарсенова.
Экологиялық акция барысында жастар ерекше белсенділік танытты. Студенттер мен еріктілер ықыласпен жұмысқа кірісіп, елдің болашағын қалыптастыратын ұрпақ екендерін көрсетті.
«Осындай акциялар мен бастамалар жастарда және өңір тұрғындарында экологиялық мәдениет пен жауапкершілікті қалыптастыруға ықпал етеді. Жыл басынан бері Петропавл қаласында «Таза Қазақстан» бағдарламасы аясында 290 жастар іс-шарасы өтті, ал облыс бойынша 1200 шара ұйымдастырылды», – деді қалалық Жастар ресурстық орталығының басшысы Дамир Абдин.
Тазалық пен табиғатқа қамқорлық идеясы Солтүстік Қазақстан облысының барлық аудан тұрғындарын біріктірді. Онда да адамдар бірлесіп көшелерді, саябақтар мен скверлерді ретке келтіріп, қоқыс жинап, ағаш отырғызды, туған жерді аялаудың қаншалықты маңызды екенін көрсетті.
«Мамлют ауданының тұрғындары да акцияны белсенді қолдады – оған шамамен мыңға жуық адам қатысты. Бүгін ауданда 300-ге жуық көшет отырғызу жоспарланған. Жалпы күзгі отырғызу науқаны барысында 2000-нан астам ағаш отырғызуымыз керек», – деді Мамлют ауданының әкімі Елена Степаненко.
Акция қорытындысы бойынша өңірде 405 тоннадан астам қоқыс жиналып, шығарылды. Сондай-ақ солтүстікқазақстандықтар 2,5 мыңнан астам көшет отырғызды. «World Clean Up Day» акциясы өңір тұрғындарының азаматтық жауапкершілік деңгейінің жоғары екенін көрсетіп, табиғатты қорғау мәдениетін қалыптастыруда және туған өлкені аялау сезімін нығайтуда маңызды қадам болды.
